Rashford leh Sancho tan hmun a la awm - Southgate

England manager Gareth Southgate chuan Marcus Rashford leh Jadon Sancho te chuan World Cup khel turin insiamṭhatna hun an la neih thu a sawi. Manchester United hmatawng pahnih tan season thar tira chetṭhat a pawimawh ang.

Tun hnai khan Southgate hian Nations League khel tur squad a puang. Season an hman ṭhat loh avangin Rashford leh Sancho te chu koh zingah an tel ve lo, kum tawpah World Cup khelh tur a nih avangin Man United duo chanchin hian sawi zui a hlawh.

Southgate chuan, "Player ṭhenkhat chuan season an hmang ṭha lo a, a bik takin season tawp dawn lama che fuh tawk lo pawh an awm. Rashford leh Sancho chauh an ni lo, player dang tam tak pawh koh an ni chuang lo.

"England hian player ṭha a ngah a, hmabak eng tak pawh a nei. Player zawng zawng tan kawng hawn a la ni reng, club tana an khelh ṭhat miau chuan tumah hnawl ngawt theih an ni lo a, kawng kharsak an awm lo," tiin a sawi.

Southgate hian a vawi khat nan Jarrod Bowen a ko. West Ham forward hian season a hman ṭhat avangin ram tana koh hi a phu. Serie A goal 17 khungtu Tammy Abraham chu koh zingah a tel bawk - tlarhma a khel thei an ngah.

England hian tuna an squad koh hmang hian Hungary, Italy leh Germany te nen Nations League an khel ang.