Tottenham-ah Conte a cham dawn

Season thara Champions League khel tura Tottenham Hotspur hruai kaitu Antonio Conte chu London club-ah a cham chhunzawm zel dawn a, chhuak tur anga sawi thawm awm chu an beng dai.

Kum 52 mi coach hian kum 2023 thleng Spurs-a cham turin contract a nei a, a duh chuan a contract hi thla 12 dang a pawtsei thei ang, tih a ni.

Mahse, heti chung hian chhuak tur anga sawi thawm a awm hman a, November thlaa Spurs zawmtu coach hian February-a Burnley an ngam loh khan, "Buaina hi coach a nih chuan chhuak turin ka inpeih a ni," a ti.

Hemi hma hian Sky Italia nen an inkawmnaah Spurs transfer kalphung chu a sawisel anga tarlan a ni bawk a, mahse, hei erawh Conte chuan a ṭawng an lehlin sual vang niin a sawi.

Hetiang boruak karah hian Conte chhuak tur anga sawi thawm a ri a, mahse, Zirtawpni khan club director of football Fabio Paratici chu Conte hian a hmu a, Spurs-ah a cham tur thu a hrilh. Chelsea boss hlui hian a contract a pawhsei dawn leh dawn loh erawh sawi theih a la ni lo.

Conte hi Spurs neitu ENIC chuan nipui transfer-ah pound maktaduai 150 an pe dawn nia sawi a ni a, Italian coach bazar dan tur hriat a châkawm ta hle.