Barca chak zana Enrique thutlukna mak ; Season tawpah Nou Camp a chhuahsan dawn

Nilaini zanah Barcelona-in 6-1 zetin Sporting Gijon an sawp a, MSN tia hriat lar Lionel Messi, Luis Suarez leh Neymar-ten goal an khung vek zana ngaihven hlawh zawk erawh Barca boss Luis Enrique a ni. Spanish manager hian season tawpa a contract zawh hunah contract thar ziah a tum tawh loh thu a sawi a, Nou Camp-a chhuahsan dawn.

Nou Camp-a inkhelah Barca tan Messi, Paco Alcacer, Neymar leh Ivan Rakitic ten goal khat

ṭheuh an khung a, Luis Suarez chuan goal hnih a khung bawk. Mikhual team-in si hnih chauh an la phurh laiin Spanish forward Carlos Castro hmangin goal khat khung ve mah se Catalan club chhaih kawlhna goal mai a ni.

Mangṭha Barca
Kum thum hnua Barcelona chhuahsan tur Luis Enrique chuan, "Thutlukna harsa tak, ngaihtuahna sen ngai tak a ni a, mah se ka duhdan ang taka kal hi ṭhain ka hre si. Club-in ka chunga rinna an nghah tlat avangin ka lawm a, kum thum hriatreng tawh tur he hmunah hian ka hmang a ni," a ti.

Enrique chuan chawlh ma­mawh vanga Barca chhuahsan tur a nih thu sawiin, "Chawlh hahdam ka mamawh a ni. Ka hun tam zawk chu he team-in hma kan sawn theihna tur te, kan chak lohna lai thuam ṭha tura a siamṭhatna zawng reng reng ten ka hmang a, hahdam taka hun hman ve ka duh a ni," tiin a sawi.

Spanish manager chuan a hmabaka hnathawh tur awm erawh ṭha taka hlen a tum thu sawiin, "Inelna pathumah nomawi chawi turin thla thum chhung hun kan la nei a, Champions League-ah kan dinhmun chhe tawh viau mah se beisei bo a la ni lo," tiin last 16 first leg-a 4-0 ngawta an ngam loh Paris Saint Germain hneh theih a la inbeisei thu a sawi nghal.

Enrique sulhnu
Kum 46-a upa Luis Enrique-a'n kum 2014 khan Barcelona a enkawl ṭan a, a season hmasa berah Champions League, La Liga leh Copa del Rey nomawi a chawipui nghal vek.

Spanish manager hian a season hnihnaah Champions League nomawi an kawl lai humhim thei lo mah se league leh Spanish Cup-ah erawh a champion pui leh tho a, FIFA Club World Cup nomawi chu 2015 khan a chawipui bawk. Tun season-ah Spanish Cup final lut tawhin La Liga-ah hma an hruai mek, Champions League-ah last 16 second leg an la hmabak bawk.

FIFA Coach of the Year 2015-a thlan Enrique hian player a nih laiin kum 1996-2004 inkar khan Barcelona tan a khel a, inkhelh a chawlhsan hnuah pawh Catalan club-ah tho hian a coaching career ṭanin kum 2008-2011 inkarah khan Barcelona B team a enkawl.

Barca a chhuahsan hnuah AS Roma leh Celta Vigo chu kum khat ve ve enkawlin Barcelona-ah bawk a kir leh a ni.

Enrique kan lawm e
Barca coach hlui leh player a nih laia Enrique nena kheldun ṭhin Pep Guardiola chuan, "Ka hmangaih em em ka club a chhuah­san dawn avangin ka hnual a, a nungchang leh mizia enin Barcelona enkawl tura mi ṭha ber a ni a, chutiang mi kan chan chu a pawi ka ti a ni," tiin Enrique chhuak tur chu pawi a tih thu a sawi.

Manchester City boss chuan sawi chhunzawmin, "Kum thum chhungin awihawm loh khawpa players ṭha tak takte nen awihawm loh khawpa football hmuhnawm min thlirtir a, Barcelona fan rinawm tak ka nihna angin ka club-a a hnathawh avangin lawm­thu ka hrilh a ni," tiin a ṭhianpa chu inti neitu takin a thlah.

Kum tira Enrique hnena con­tract thar an zawrh tur thu sawitu Barcelona president Josep Maria Bartomeu chuan, "Luis Enrique hian hlawhltinna tam tak min chharpui a, kan hmaah pawh chu hlawhtlinna chu min la hmuhpui leh ang. Luis-a thutlukna hi kan pawm a, coach ropui tak a nih avangin a duhdan taka hmingṭha taka thlah hi a phu a ni," tiin an coach thutlukna hnial an tum loh thu a sawi.

Enrique thlaktu tur?
Barcelona boss Luis Enrique-a'n Nou Camp-a chhuahsan tur thu a sawi hnu lawkah Catalan club enkawl tur an inrinsiak nghal a, Sevilla boss Jorge Sampaoli, Everton manager Ronald Koeman leh Qatari club Al Rayyan enkawltu Michael Laudrup te hming lamrik a ni.

Sevilla manager Jorge Sam­paoli-a'n La Liga-a a season hma­sa berah beisei phak bakin Sevilla a chet ṭhatpui a, kum 2015 Copa America-ah Chile a lo champion pui tawh bawk avangin a hming a ri ring hle.

Buaina awm chhun erawh Barcelona-in manager tawnhriat ngah leh sulhnu ropui nei aiin an club hrechiangtu manager atan an thlang ṭhin a, an kalphung hi an thlak a nih loh chuan Koeman leh Laudrup chu Barca enkawl thei turin an buk a rit hle.

Koeman vs Laudrup
Kum 1989–1995 inkara Barcelona tana lo khel tawh Koeman hi Catalan club enkawl awm bera ngaih a ni.

Netherlands international hlui hian inkhelh a chawlhsan hnuah 1998-2000 inkarah khan Barca assistant manager dinhmun a lo chelh tawh a, Dutch club Ajax (2) leh PSV (1) chu league-ah a champion pui ve ve tawh a, Valencia a season khat a cham chhungin Copa del Rey nomawi a chawipui tawh bawk.

Denmark international ṭhin Laudrup-a'n 1989–1994 season inkarah Barcelona tan khel mah se Catalan club aṭang hian a hunlaia coach Johan Cruyff nen an inhmuhthiam loh avangin Real Madrid a zawm a, nomawi a chawi chhunzawm - Barca fan ten an la theihnghilh kher lo ang. Inkhelh a chawlhsan hnuah Denmark assistant manager niin bul a ṭan a, club lian enkawl a la nei lo.

Danish club Brondby a enkawl laiin Danish Superliga (1), Danish Cup (2) Danish Super Cup (2) te a chawi a, Swansea City chu League Cup-ah a champion pui a, Lekhwiya chu Qatar Stars League-ah a champion pui tawh bawk - Barcelona hmaa inchhuan nan erawh a nau deuh mai thei.