Ranieri a mal lo Nomawi chawi hnua ban manager pakua an awm
Leicester City-in khawvel barakhaih turin Premier League-a beisei loh taka champion puitu coach Claudio Ranieri an ban a, mah se Italian manager hi champion nomawi chawi hnu season-a ban tawk awm chhun a ni lo. Foxes chanchina hriat hlawh reng tawh tur manager hma hian khawvel huapa hriat hlawh Jose Mourinho leh Louis Van Gaal te meuh pawh nomawi an chawi hnu season-ah ban an lo ni tawh.
Jose Mourinho, Roberto Di Matteo (Chelsea)
May 2015 khan Jose Mourinho chuan Chelsea chu Premier League nomawi a chawipui a, season tharah erawh beisei an phak lo hle. Eden Hazard, Cesc Fabregas leh Diego Costa ten an thiam an theihnghilh ta emaw tih mai turin an khel a, December 2015 a thlen meuh chuan relegation zone chung chiahah awmin Mourinho ban a ni.
Kum 2003-a Roman Abramovich-a'n Chelsea a enkawl hnuah coach vawi 10 zet an thlak hman a, an nomawi duh em em Champions League chawipuitu Roberto Di Matteo meuh pawh an zuah lo - Europe a club ṭha ber dinhmun an luah hnu season-ah Italian manager hi an ban.
Fabio Capello, Bernd Schuster (Real Madrid)
Real Madrid-in Vicente del Bosque hnuaia league nomawi an chawi hnuah kum thum chhung zet La Liga nomawi an chawi thei lo - vawi khat palina an ni a, a bak kum hnihah pahnihna aia sang an thleng lo. Fabio Capello an lalut a, Italian manager hian kum hnih a chamnaah league nomawi a chawipui - mah se nomawi a chawi aṭanga ni 11-naah ban nghal a ni.
Bernd Schuster-a'n Capello a thlak a, 'boring football' a khel tih vanga an ban Capello tih loh dan takin attacking football a lantir a, nomawi a chawi bawk. Mahse, nomawi an chawi hnu season-ah point kuaa Barcelona an phak loh laiin an ban!
Laurent Blanc (PSG)
Arab sum hmanga inla lian mek Paris Saint Germain-in 2015-16 season-ah France-a nomawi chawi theih pali chawi vek mah se Champions League nomawi chawi duh vangin coach Laurent Blanc an ban a, Europa League-a season thum a zawna champion tawh Sevilla boss Unai Emery an lalut - Ligue 1-ah pahnihna an ni mek a, an duh ber Champions League last 16 first leg-ah erawh Barcelona chu 4-0 zetin an sawp thung.
Dave Mackay (Derby)
Kum 1972 leh 1975 khan khatih hunlaia English football inelna sang ber first division-ah Derby County an champion a, kum 1972-a champion puitu coach Brian Clough an banna a thehluh hnuah Dave Mackay hoin 1975-ah nomawi an chawi leh a, mah se British coach hi a champion hnu season-ah table-a 19-na an nih mek laiin ban a ni a, UEFA Cup aṭangin pet chhuah an ni bawk. Mackay hian Derby hotute chu kumtina nomawi chawi tum tiin a sawisel zui a, kum 42-a liam hnuah pawh Derby-in nomawi an la chawi leh rih lo!
Felix Magath, Louis Van Gaal, Udo Lattek (Bayern Munich)
Felix Magath-a'n Bayern kum hnih a enkawl chhungin 2005 leh 2006-ah Bundesliga leh German Cup nomawi a chawipui ve ve a, Champions League-ah an beisei ang result a neihpui theih loh avangin kum 2007-ah ban a ni ta tho! Kum 2010 khan Louis van Gaal chuan Bayern hi league nomawi a chawipui bakah Champions League final a luhpui a, a season lehah ban a ni - thutlukna erawh an siamsual lo, Dutch coach thlaktu Jupp Heynckes hnuaiah Bundesliga leh Champions League nomawi an chawi.
Bayern-in thutlukna an siamsualna ber nia ngaih theih erawh Udo Lattek a ni. Club enkawl la nei ngai lo Udo hian kum 1970-a Bayern coach a nih hnuah kum thum chhung a zawnin league nomawi a chawipui a, kum 1974 khan German club zinga European Cup nomawi chawi hmasa ber a nihpui bawk.
Mahse, Europe-a an champion hnu season hmasa berah Lattek hian first round aṭanga an tlak hnuah thil thlak danglam ngai a awm thu Bayern hruaitute a hrilh a, an thlak ngei - amah an ban daih! Bayern-in an tisual chiang hle. Lattek-a'n Borussia Monchengladbach a pan a, season hnih a zawna league nomawi chawipuiin UEFA Cup-ah an champion bawk a, 1978 European Cup final-a luhpui bawk.
Kum 1983 khan Bayern hian Lattek hi an lalut leh a, Bundesliga-ah vawi thum champion pui lehin German Cup-ah vawi hnih nomawi an chawi bawk. Mahse, Lattek hi a vawi hnih nan 1987 season zawhah ban a ni - ban a nih hma hian league nomawi a chawipui bakah European Cup final a luhpui a, player-ten an hek vanga ban tawk anga sawi a ni.