FA Cup Town tan City an lian mah mah
Huddersfield Town-in Etihad Stadium-ah Harry Bunn hmangin goal khung hmasa mah se Manchester City-in goal ngain an chhanglet. FA Cup fifth round replay-ah Pep Guardiola hoten hnehna changin quarterfinal an lut a, City hian quarterfinal-ah Middlesbrough an hmachhawn ang.
Nilaini zan inkhelah hian City tan Sergio Aguero-a'n goal hnih a khung a, Leroy Sane, Pablo Zabaleta leh substitute Kelechi Iheanacho ten goal khat ṭheuh an khung bawk.
Premier League beisei
Huddersfield-in FA Cup nomawi chawi an inbeisei lo a, an duh chu season thara Premier League khelh a ni. Head coach David Wagner-a'n City lakah chak a inbeisei lo a, league match-a Barnsley nen an inhmachhawn ṭum aṭangin player pakua zet a thlak.
Championship club-in bul ṭan ṭha mah se hun a tawp meuh chuan player nei ṭha City an tluk lo tih a lang. Amaherawhchu Huddersfield tan hnualna tur a awm lo a, an club history-a Premier League la khel ngai lo tan an hun ṭha neih bawhpelh a thiang lo.
Huddersfield hi league-ah point 65 hmuin pathumnaah an awm a, match khata khel tlemin an chungchiaha awm Brighton & Hove Albion chu point ruk chiahin an pha lo.
Championship-ah hian team 24 awmin a sang pahnih chu Premier League khel turin an tling nghal a, pathumna aṭanga paruknain playoff hmangin hmunruak pakhat an inchuh bawk ang.
Nomawi lak a ṭul
Manchester City neitu Sheikh Mansour-a'n coach hming langsar Pep Guardiola a lakluh chhan chu an club dinhmun chawisan a duh vang a ni a, Champions League nomawi chu an beisei ber a nih rualin ram chhung inelnaa an hlamchhiah thiang lo.
City-in league-ah point 11 zetin Chelsea an pha lo a, match khatin khel tlem mah se Premier League nomawi beisei ngam a harsa tawh ang. Hetihlai hian an hmelma Manchester United chuan League Cup nomawi an chawi a, FA Cup an lak hi a chhanlet nan a pawimawh.
Kum 2011 khan City hian FA Cup nomawi an chawi a, kum hnih hnuah Wigan Athletic hneh loin final-ah an chak lo. Hemi hnu hian Manchester City hian semifinal an la lut leh lo a, tun season-ah pawh semifinal thleng turin kum 2015-a an hneh loh Middlesbrough an paltlang theih a ṭul ang.
Guardiola thukhawchang
Man City boss Pep Guardiola chuan, "Goal kan chhuah lai pawh khan kan ṭha a, team ṭha lakah game ṭha tak kan khel a ni. Kan lawmna chu quarterfinal kan lut hi a ni," tiin an chak avangin a lawm.
Spanish manager Guardiola hian Aguero chu inkhel bul a ṭantir a, goal hnih a khung bakah Huddersfield tlarhnung tan a hnawksak hle. Barcelona keeper hlui Claudio Bravo pawh Willy Caballero aia thlan a ni a, Chilean keeper hian City player hlui Bunn-a ball pet chu a kap karah a chhuah.
Pep chuan, "Sergio Aguero
ṭhat ber ṭum a ni a, a hmuhnawm takzet a ni. A hun takah a inlar a, ani ang chiah hian Bravo a khel ṭha bawk. Kan keeper ball sem ṭha khan nasa takin kan khelh danah nghawng a nei a ni," tiin Barcelona aṭanga Joe Hart thlak nana a hman Bravo a chhan tlat.