Real chhantu Cristiano Ronaldo

Gareth Bale chuan Nilaini zan La Liga inkhelah red card a hmu a, Real Madrid-in player 10-a khel chungin Las Palmas an draw hram. Cristiano Ronaldo chuan hun tawp hma minute nga a la awm tihin goal hnih a khung.

Zinedine Zidane hote hian point khat chauh an hmuh avangin point 57 hmu tawh Barcelona chu point khatin an pha lo a, amaherawhchu Los Blancos hi Catalan club aiin match khatin an khel tlem.

Santiago Bernabeu-ah mual­neituin Isco hmangin minute riatna lekah goal an khung nghal a, minute hnih hnuah Las Palmas-in Tan hmangin an sut nghal. Yellows hian keeper leh defence inkarah hmun zuah zau mah se a phui ṭhat avangin Real lamin an paltlang thei lo.

Minute 47-naah Gareth Bale a insum zo lo a, Welsh forward hian Jonathan Viera a pet vangin yellow card a hmu a, a nam zui leh bawk avangin referee Fernandez Borbalan-a'n a hnawt chhuak. Mikhual lamin an tamna hmang ṭangkaiin Sergio Ramos vanga an penalty hmuh chu Viera-a'n minute 56-naah a khung a, minute thum hnuah Kevin-Prince Boateng-a'n Las Palmas goal thumna a khung leh bawk.

Las Palmas-in point thum hmuh theihna hun ṭha an hloh a, Castellano handball vanga Real penalty hmuh chu Ronaldo-a'n minute 87-naah a khung. Portugal captain hian minute hnih hnu lekah tauh goal lehin 3-3 in inkhel a tawp.

Real Madrid coach Zinedine Zidane chuan, "Ngaihdam a dil a, red card a hmuh danah lawm lo mah se a nih tur ang a ni vek tawh," tiin Bale-a'n a chetdan mawi lo vanga ngaihdam a dil thu a sawi a, referee chungchang erawh a sawi zui duh lo.

French manager Zidane chuan, "Chhuanlam siam kan tum lo a, kan hma lama result ṭha zawk kan neih theih nan a rang lama insiamṭhat a ṭul a ni. Hun harsaa point hlawh chhuak turin kan huaisen tawk tih kan lantir a, chutihrualin tuna aia kan inpeih hi a ṭul a ni," tiin point hloh nawn a duh loh thu a sawi.

Inkhel Results
Real Sociedad 2 - 2 Eibar
Málaga 1 - 2 Real Betis
Valencia 1 - 0 Leganés
Osasuna 1 - 4 Villarreal
Barcelona 6 - 1 Sporting Gijón
Celta de Vigo 2 - 2 Espanyol
Real Madrid 3 - 3 Las Palmas
Granada 2 - 1 Deportivo Alaves