Densill a la ngai reng - Chhawnkima

Mumbai FC-in captain atan Densill Theobald an hmang a, Mizo tlangval Lalchhawnkima chuan Royal Wahingdoh tana a khelhpui ṭhin Trinidadian midfielder chu kum 34-a upa ni tawh mah se a ṭhat dan a la ngai reng niin Vanglaini palai a hrilh.

Inrinni tlai dar 2:05 khian Aizawl FC leh Mumbai FC te an inkhel dawn a, TV lamah en theih a nih dawn loh avangin football ngainatute RG Stadium, Mualpui pan a fuh ang. Mumbaikars captain Theobald hian Manchester United striker hlui Dwight Yorke leh Swansea City defender hlui Dennis Lawrence ten ram tana inkhelh an chawlhsan hnuah Trinidad and Tobago tan captain armband a hreng.

Aizawl FC defender hlui Chhawnkima chuan, "Densill Theobald hi chu a ṭhat dan a la ngai reng a, tuna kan result ṭha tawk lo hi chu kan vanduai vang a ni. Mumbai-a AFC kan hneh loh ṭum ai khan kan ṭha tawh zawk daih a, chak tumin kan khel ang," tiin Mizo club laka point a inbeisei thu a sawi.

Soca Warriors-in 2006 FIFA World Cup an khelh khan Densill hi group match thumah a inlan vek a, Sweden nen inhnehtawkin England leh Paraguay hneh lo mah se Inrinnia RG Stadium-a inlan tur hi Zlatan Ibrahimovic, David Beckham, Steven Gerrard, Frank Lampard bakah player ṭha ṭhahnem tak nen mual khatah an awm ho tawh.

Theobald hian India rama a inlan hmasak berah Dempo SC chu I League-ah a champion pui a, hemi hnu hian tun ṭuma Mumbai FC coach Santosh Kashyap kaihhruaina hnuaiah Royal Wahingdoh chu pathumna a nih pui bawk. Nikum khan Trininadian midfielder hi Goan club Sporting de Goa tan a khel a, RG Stadium-a Aizawl FC 2-0 a an hneh ṭumin player pawimawh a ni.