German Cup Bayern semifinal luhna Lewandowski

Robert Lewandowski goal hnih khung hmangin Bayern Munich chuan Schalke 3-0 in an hneh a, German Cup semifinal an lut. Borussia Dortmund leh Sportfreunde Lotte te inkhel tur erawh vur tlak nasat vangin a hun sawn a ni.

Nilaini zan Allianz Arena-a inkhelah Lewandowski chuan minute thumna lekah Franck Ribery ball pek chu a chip lut nghal. Poland international hian Thiago Alcantara (16') goal khung tur siamsak zuiin minute 29-naah an goal thumna a khung leh bawk.

First half a zawh meuh chuan Bayern an chak chiang tawh a, second half-ah Schalke defender Holger Badstuber chu yellow card vawi hnih hmuh vangin hnawhchhuah a ni - inkhel result a thlak danglam phah tawh lo thung.

Kum 28-a upa Lewandowski hian Bayern Munich tan tun season inelna hrang hrangah goal 30 a khung tling tawh a, heng zinga goal 19 chu Bundeslga bikah a ni. Bayern-in an khelmuala match 15 chhung chak loh nei loa an kaltluan theih nan a thawhhlawk hle.

Bayern hian a zawnin sea­son riat chhung German cup semifinal an lut ta a, an club record a ni. Bayern hian Schalke nen an intawn hnuhnung vawi 14-ah chak loh an nei miah lo a, kuminah hian an champion a nih chuan DFB-Pokal title vawi 19 an lakna tur chiah a ni ang.

Inkhel dangah Borussia Mon­chengladbach chuan Ham­burg 2-1 in an hneh a, Mon­chengladbach hian semifinal-ah chuan Eintracht Frankfurt an mikhual ang. Bayern hian Dortmund leh Sportfreunde Lotte te inkhel a chak zawk an hmachhawn ve thung dawn a, Dortmund ten quarterfinal an khelh hun tur hi ruat chian a la ni lo.

Bayern Munich coach Carlo Ancelotti chuan, "Ribery khan a khel ṭha hle a, goal pathumah khan a inrawlh vek. Hun rei tak a chawlh huna khatiang taka a rawn khel chhuak thei kha ka lawm hle," a ti. Kum 33-a upa Ribery hi January khan training-naah a inhliam a, he mi hnua a vawi khat nan inkhel bul a ṭan a, a hliam a dam chiang tawh tih khelmual chhungah a lantir.

Ancelotti chuan sawi chhun­zawmin, "A tir aṭangin Schalke tlarhnung kha na takin kan nawr nghal a, kan chhaih buai hma bakah goal kan khung nghal. Hma kan hruai awlsam avangin a hnulam kha chu hna harsa a awm tawh lo," a ti.

Schalke coach Markus Weinzierl chuan, "Minute 30 a ral meuh chuan goal thum kan phur tawh a, a nihna takah chuan kan huaisen tawk lo a ni. Kan theihna zawng zawng kan hmang lo, Cup inelna tawp rih mah se league lamah result ṭha neih kan tum ang," tiin a sawi.