Roma lakah Lazio chak ve ta
Nilaini zan Coppa Italia semifinal first leg inkhelah Lazio chuan an mikhual AS Roma 2-0 in an hneh a, Rome derby-ah Lazio hian kum 2013 hnu lama chak ni hmel an hmuh lehna hmasa ber a ni.
Coppa Italia vawi ruk champion tawh Lazio tan hian Sergej Milinkovic-Savic (29') leh Ciro Immobile (78') ten goal an khung a, second leg hi April 5-ah khelh leh a ni ang. A chak zawk hian Juventus leh Napoli te inkhela chak zawk an hmachhawn leh ang, Juve hian 3-1 in hma an hruai tawh avangin an dinhmun a ṭha ve tawh bawk.
Lazio hian Roma an hneh khat hle a, kum 2013 May thla khan Copa Italia final-ah Senad Lulic-a goal awm chhun khung hmangin hnehna an chang a, hemi hnuah vawi sarih inkhel leh tawhin vawi nga an chak lo a, ṭum hnih an inhnehtawk - tunah erawh an record duhawm lo an thaibo leh ta.
Roma defender Anthony Rudiger chu first half-ah Lazio fan-ten chi inthliarna rawng kaiin an auel a, thupuangtu lamin fan-te chuan an thil tih an titawp a nih loh chuan inkhelh chhunzawm theih a nih loh thu a puan hnuah he thil hi a reh chauh.