Novak Djokovic-a'n phuba a la

Novak Djokovic chuan Rio Olympic first round-a a hneh loh Juan Martin del Potro chu nimin khan Mexican Open second round-ah a hmachhawn leh a, inkhel inhneh­­tawk takah 4-6, 6-4, 6-4 in a hneh.

World number 2 Djokovic hi tun inelnaah hian seeded pakhatna a ni a, tukin dar 7:30 hian Nick Kyrgios a hmachhawn leh ang. Australian star Kyrgios hian Donald Young chu 6-2, 6-4 in a lo hneh ve bawk a ni.

Inkhel dangah seeded pahnihna Rafael Nadal chuan Paolo Lorenzi 6-1, 6-1 in a sawp. Nadal hian a khingpui service vawi nga a chhuh­sak a, amah service ṭumah point nga chiah a hloh! Italian tlangval lakah Nadal hian vawi 12 hnehna a channa chiah a ni. Quarterfinal-ah chuan Jordan Thompson hnehtu Yoshihito Nishioka nen an inkhel ve leh thung ang.

American Sam Querrey chuan seeded pangana David Goffin chu darkar khat leh minute kua lekah 6-2, 6-3 in a hneh a, Marin Cilic chuan Borna Coric lakah 6-3, 2-6, 6-3 in hnehna a chang ve bawk.