Aizawl FC-in Mizo mipui puihna an mamawh ; Mizo club hmaah Mumbai FC tha zawk

I League khelh hun a inher chhuak leh ta a, RG Stadium-ah Aizawl FC leh Mumbai FC te an inkhel dawn. Chawhnu dar 2:05-a inkhel tur hi TV-ah pek a ni dawn lo a, inkhel pawimawh thlir duh tan khelmual pan mai tur a ni.

Inrinni a nih avangin inkhel en tur ṭhutna ṭha duh tan kal hma ngei a ṭul ang.

Inkhel pawimawh
Aizawl FC-in point 23 an hmu tawh a, East Bengal an phak lohna chu point khat chauh a ni. Mizo club hi champion thei dinhmunah an ding a, amaherawhchu match sarih lai khelh tur an la neih avangin champion an la sawi ngam lo.

AFC coach Khalid Jamil chuan, "Champion lam kan la hawi thei lo a, Mumbai FC nena kan inkhel tur chauh hi kan ngaihtuah a ṭul a ni," tiin pressure a inpek belhchhah duh lo.

Mizo club tan champion lam hawi theihna inkhel a nih avangin a pawimawh a, an khingpui tur Mumbai FC hian point kua chiah an la hmuh avangin table hnuai lam aṭanga tal chhuak turin inkhel pawimawh a ni.

Mumbai FC an ṭha
Season liam taa Aizawl FC defender pawimawh Lalchhawn­kima'n Mumbai FC kawr a ha tawh dawn. Champhai tlangval Chhawnkima chuan, "Player a-

ṭang­a teh tur chu ni se kan ṭha zawk. Amaherawhchu kei ni chuan team kan din har a, foreigner kan neih tlai avangin result ṭha kan nei lo," tiin a rilru put hmang dik tak a sawi.

Mizo club hian Cooperage Ground-ah Mahmoud Al Amna goal hmangin Mumbai FC chu 1-0 in an hneh a, he mi ṭum hian inhliam vangin Chhawnkima hi a khelh loh bakah foreigner pakhat chiah Densill Theobald an nei a, Trinidadian midfielder hi bench-ah a la ṭhu bawk.

Tun ṭumah erawh Santosh Kashyap-a hman turin captain Theobald, Aghan defender Dje­laludin Sharityar bakah Brazilian pahnih Anderson leh Alex Willian te chhawr theihin an awm a, East Bengal player hlui Baljit Sahni a awm tawh bawk. Tlar hnung lama awm turin India tana vawi 32 inlan tawh Mehrajuddin Wadoo an nei a, Jammu and Kashmir defender hian ngaihnawm tham sulhnu a nei tawh.

A hmuhnawm dawn
Aizawl FC-in midfield-ah Mah­moud al Amna an nei a, kum 34-a upa midfielder hian Syria tan vawi 78 zet khelin goal 23 lai a khung.

Mumbai FC captain Theobald hi Trinidad and Tobago tan vawi 92 a inlan tawh a, khawvela football inelna sang ber FIFA World Cup thlengin khel tawh mah se goal hnih chiah a la khung.

Midfield-a Theobald leh Al Amna te intawng tur ringawt pawh hi RG Stadium pan tham a tling.

Inkhel hmuhnawmna belhchhah turin Aizawl FC-in chak ngei an mamawh a, hei vang hian Khalid Jamil-a hoten attacking football an khelh a ṭul. Season ṭan hmaa pathumna nih phak tum Mumbai FC lamin match kaw chhung chak hmel an hmuh tawh loh bawk avangin point khata lungawi tur an ni tawh lo.

Aizawl FC coach Khalid Jamil hi Mum­bai FC coach hlui a ni a, Santosh Kashyap-a tan Mumbaikars coach hlui laka vawi hnih chak loh hi mualphona a tling pha bawk.

Aizawl FC coach Khalid Jamil chuan, "Team ṭha tak an nih avangin kan theihna zawng zawngin kan khelh a ṭul a ni," tiin chesual thei an nih tih a chiang. Hetihlai hian Kahsyap pawhin Mizo club-in result ṭha an neih avanga khelh an harsat tur thu a sawi.

An ṭawng zel
Aizawl FC boss Khalid Jamil chuan, "Mumbai FC hi ka club hlui an nih avangin a danglam phah lo. Chak ngei kan mamawh avangin mipui puihna pawh kan mamawh a, ṭantu kan neih ṭhat chuan player pawh an khel ṭha a ni," tiin mipui puihna a sawm.

Mumbai FC coach Santosh Kashyap chuan, "Mizo player ka rin avangin Kimkima hi ka luhtir dawn a, match 10 chhung khel tawh lo ka luhtir hian ka ring tawk tih a lantir a ni. Mizoram hi nuam kan ti a, a boruak a nuam a, mipui an fel a, Mumbai lama kan khelmual pawh articifical turf tho a ni a, boruak leh ground vangin harsatna kan nei lo ang," tiin Mizo mipui leh Mizoram a ngaihnat thu a sawi ve bawk.