United tana hun tawp hman duh Carrick
Michael Carrick chuan season tawpa Manchester United-in contract an zawrh loh chuan football khelh chawlhsan mai a duh thu a sawi.
Kum 35-a upa Carrick hian July 2006 khan Tottenham Hotspurs aṭangin United hi pound maktaduai 18.6-in a zawm a, Red Devils legend Roy Keane-a jersey number kalsan 16 a ha nghal.
English midfielder Carrick chuan, "Club dang jersey nen ka la mitthla thiam lo, a bik takin England club tan," tiin a sawi.
Old Trafford-a player awm laiah United tana inlan hnem ber pahnihna a ni a, Carrick hian captain Wayne Rooney chiah a tluk lo. English midfielder hian Red Devils hi Premier League nomawi panga, Champions League pakhat, FA Cup pakhat bakah League Cup pathum a lakpui tawh.
Contract zawrh lo ta se inkhelh a chawlhsan mai ang em tiha zawhna chhangin Carrick chuan, "Ka chhanna tur chu 'aw' tih a nih ngei ka ring a, 100% in ka la chiang lo a, mah se ka chawlh a rinawm zawk," tiin United tana hun tawp hman a duh thu a sawi.
United-in Carrick-a thawhrah an hria a, English midfielder pual hian Testimonial Match khelh a ni dawn. He inkhelah hian Manchester United 2008 XI leh Michael Carrick All-Stars te chu June 4, 2017 khian Old Trafford-ah an inkhel ang.
Manchester United hian zanin dar 6:00 hian Bournemouth an mikhual dawn. Tun season ṭantirha an inhmachhawn ṭumin United 3-1 in an chak a, Zlatan Ibrahimovic chuan United jersey hain Premier League a khelh ṭanna niin Swede striker hian goal a khung nghal.