Constantine-a squad thlan danin sawi a hlawh India coach-in I League a en ngai lo em ni?

AFC Asian Cup Qualifiers khel tura inbuatsaih India-in probable squad a puang a, players 31 koh chhin zingah Mizo pali Jeje Lalpekhlua, Daniel Lalhimpuia, Isaac Vanmalsawma leh Jerry Lalrinzuala te koh tel ni mah se, I League-a che ṭha players zingah koh loh eng emaw zat an awm a, India coach Stephen Constantine thutluknain zawhna tam tak a hring chhuak.

British coach hian a players thlan dan chungchangah, "I League leh Indian Super League-a player-te khelh dan en chungin India tana khel tur hi koh a ni a, ka sawi fo ṭhin angin tu tan pawh kawng hi chu a inhawng reng a ni, " tiin a sawi.

Nimahsela a player thlan chhuah en hian, I League a en ngai lo a ang ber a, India ram club inelna sang bera players che ṭha engemaw zat en kân an ni hi a mak a ni.

Khawiah nge Didika?

Hliam vanga rei tak a inlan theih loh hnuah Lalrindika Ralte-in tun season-ah East Bengal tan captain armband a hreng a, player pawimawh ber pawl a ni nghal.

Didika'n league match kua khel tawhin assist vawi nga a nei tawh a, goal khat a khung tawh bawk. Lunglei tlangval hian minute 90 danah 0.6 assist a nei ang a ni a, key pass a neih zat hi chawhrualin minute 90 danah 2.4 ang zel niin an team goal khungna kawngah vawi riat zet a inrawlh. Tlarhnung lamah pawh Didika thawhrimna hmuh maih theih a ni lo. India tana vawi 14 inlan tawh midfielder hian minute 90 dana tackle vawi riat nei ziah ang a ni a, heng zingah hian 4.4 a hlawhtling.

East Bengal captain Didika koh a nih loh lai hian Red and Gold tana tun season-a match hnih chiah la khel Mohammed Rafique leh match li bak la inlan lo Jackichand Singh-te koh an ni leh lawi si! India coach thutlukna hi hriatthiam a har a ni.

Didika chuan, "ISL-ah Atletico de Kolkata ka champion pui a, East Bengal-ah season duhawm tak ka hmang mek bawk. Mahse, India tana inlan tura koh zingah ka tel lo a, hnual nan erawh hman ka tum lo. Theihtawp ka chhuah chhunzawm zel ang," tiin Vanglaini palai a hrilh.

Sena a lang lo

Tun hnaia Indian left back zinga ṭha ber pawl thlan tur ni ta se Bengaluru defender rinrawl Sena Ralte hi lam hmaih theih a ni lo. North Mualcheng tlangval hian league match sarih khel tawhin I League left back zinga key pass ratio nei ṭha ber pawl a ni a, Bangalore club-a Sena tluk lotu Nishu Kumar chu koh a ni thung! Uttar Pradesh rawlthar hian tun season-ah minute 158 bak league-ah a hmel a la lan lo.

Tlar hnung lamah rin loh takin Churchill Brothers defender Fulganco Cardozo koh a ni bawk a, kum 29-a upa defender hian I League club zinga tlarhnung nei chhe ber pawl Churchill tan meuh pawh minute 344 bak a hmel a la lan lo. Mohun Bagan defender ṭangkai Souvik Chakraborty erawh Rwanda coach hlui hian a hmuh hmaih leh hlauh thung si!

AFC = NIL

India ram league sang ber I League-ah hmuhnawm takin Aizawl FC an khel a, Mizo club-in nomawi an beisei ngamna kawngah Jayesh Rane, Albino Gomes, Brandon VL Remdika leh Lalruatthara ten thawhhlawk viau mah se, Aizawl FC players pakhatmah koh zingah an tel lo.

Indian Super League-ah Chennaiyin FC tan Rane a hmuhnawm a, Aizawl FC-ah che ṭha zual zel - Mizo club goal khung parukah a inrawlh tawh. Brandon sawi hmaih a thiang lo a, Hunthar tlangval hian a match hnuhnung paliah goal thum a khung tawh.

Mahse, Constantine-a'n DSk Shivajians tana match nga chiah la khel Seityasen Singh, Churchill tana league match-a minute 176 bak la hmang lo Anthony D'Souza te a thlang zawk!

Aizawl FC chet ṭhat chhanah Albino Gomes sawi hmaih a thiang lo. Kum 23-a upa goalkeeper hian league match 11-ah a hmel lan vekin match ruk zet goal chhuah loin a awm thei a, penalty vawi hnih lai a dang bawk. Mahse, India coach duhthlanna chu league match nga chiah la khel Subrata Paul leh Bengaluru tana beisei phak lo Amrinder Singh te an ni lawi si.

I League-a left back khel ṭha pawl thlantur ni se Lalruatthara hming hi lam hmasak pawl tur a ni. Mahse, India coach erawhin ngaihdan dang a nei a, Hmunhmelṭha tlangval Ruatthara a ko lo.

Balwant a riang

Mohun Bagan-ah Jeje Lalpekhlua leh Darryl Duffy awm vangin Balwant Singh an hmun chang tam tawk lo mah se, 2013-14 FPAI Best Indian Player hian a hmel a lan chhunah Bagan fan-te a beidawntir ngai lo. Minute 90 dana 0.8 goal khung ang a ni a, assist nen chuan minute 90 danah goal khata inrawlh zel ang a ni. Punjabi striker hi minute 90 dana 3.3 key pass nei ang a ni bawk a, a aia India coach duhthlanna erawh Sumeet Passi a ni.

Kum 21-a upa striker Passi hian ISL-ah NorthEast United tan khelin match li a inlanah vawi khat chiah shot a nei a, I League kal mekah DSK Shivajians tan match nga khelin minute 90 khelh tluan a nei lo. Goal khung leh assist a la nei lo mai loin target-ah vawikhatmah shot a la nei lo - mahse, Constantine-a'n India tana khel turin a ṭha tawkah a ngai.

India probables squad (31)

Goalkeepers: Subrata Paul (DSK Shivajians), Gurpreet Singh Sandhu (Stabaek FC), Amrinder Singh (Bengaluru FC), TP Rehenesh (East Bengal)

Defenders: Pritam Kotal, Anas Edathodika, Subhasish Bose (all Mohun Bagan), Nishu Kumar, Sandesh Jhingan (both Bengaluru FC), Arnab Kumar Mondal, Narayan Das (both East Bengal), Dhanapal Ganesh (Chennai City FC), Fulganco Cardozo (Churchill Brothers), Jerry Lalrinzuala (DSK Shivajians)

Midfielders: Jackichand Singh, Rowllin Borges, Mohammed Rafique (all East Bengal), Seityasen Singh, Milan Singh, Halicharan Narzary (all DSK Shivajians), Udanta Singh, Eugeneson Lyngdoh (both Bengaluru FC), Pronay Halder (Mohun Bagan), Anthony D'Souza (Churchill Brothers), Isaac Vanmalsawma (Shillong Lajong)

Forwards: Sunil Chhetri, CK Vineeth, Daniel Lalhlimpuia (all Bengaluru FC), Jeje Lalpekhlua (Mohun Bagan), Robin Singh (East Bengal), Sumeet Passi (DSK Shivajians).