Anfield-ah chak tum Gunners an leng dawn

Zanin dar 11:00-ah Liver­pool chuan Arsenal an mikhual dawn a, season ṭantira champion tum team pahnih hian tunah chuan season thara Champions League khelh chu an tum ber a ni tawh - an inthlauhna hi point khat chauh a nih bawk si avangin a chak lo zawk tan season tawpa a sang pali zinga tel a harsa tawh dawn a, team pahnihin chak lo zawk nih an duh lo ang.

Tun season Premier League match hmasa berah Arsenal hian Liverpool an mikhual tawh a, 4-3 in an tlawm. Team pahnih tlarhma ten an thawh fuh ṭum chuan goal tam tak khung turin theihna an nei tih a chiang a, a pawi ber erawh tun thlengin team pahnih hian an tlarhnung phui lo an la rem dik thei lo hi a ni.

Thawh a hun ta - Klopp

Liverpool-in an match hnuhnung berah Leicester City an lenchilh a, coach ban hlim club lakah 3-1 in an mualpho. Liverpool boss Klopp chuan, "Kan tlarhnung a phui tawk lo tih hi ka pawm thlap a, insiam-ṭhat kan ngai nasa a ni. Arsenal lakah kan theihna kan pholan a ṭul a, table-ah a chung lam kan beisei zel dawn a nih chuan tun hi thawh hun chu a ni. Duhthlan tur dang kan nei lo a, kan tihtur awmchhun chu kan theihna pholan a, hnehna chan a ni," tiin Arsenal lakah tlawm a tum lo.

Klopp chuan Champions League khelh ngei an tum thu sawi nghalin, "Champions League kan khel thei a nih chuan kei chuan hlawhtlinnaah ka ngai a, 100% hlawhtlinna a ni. Europa League khelh erawh hlawhtlinnaa chhiar chi a ni em ka hre lo a, kawng dik erawh a ni. Hlawhtlinna chungchang sawi tur erawh chuan a la hma mah mah a, Leicester aṭang khan kan insiamṭhat phawt a ngai a ni," a ti.

Reds ngaihtuah rawh u - Wenger

Arsenal manager Arsene Wenger-a'n champion nomawi ai chuan Liverpool an hma­chhawn tur chu ngaihtuah hmasak phawt a ṭul thu a sawi. French manager chuan, "Chelsea aiin match khatin kan khel tlem a, mah se table chung lam ngaihtuah hman kan ni lo. Kan tana pawimawh ber chu kan hmabaka awm hlen zel a ni a, Chelsea lehpelh chungchang ai chuan Liverpool hneh phawt hian kan ngaihtuahna a luah hmasak a ṭul a ni," a ti.

Wenger-a'n chak an ma­mawh thu sawi mah se Anfield-ah inkhel hautak an hmachhawn a rin thu sawi nghalin, "Team lian kan hmachhawnin kan khel ṭha ngai lo a, kan tan chuan zanin hi fiahna tur a ni. Zanin result hian season tawp thleng nghawng a nei thei dawn a, rilru huaisen tak kan put a ṭul ang. Anfield-ah chuan fans thawm a ṭha ṭhin a, game boruak a sangin a hautak ṭhin hle," a ti a, inkhel awlsam a beisei lo.

Tu nge inlan dawn?

Liverpool tan captain Jordan Henderson-a'n an match hnuhnung berah ke phah hliam vangin Leicester a hmachhawn thei lo a, English midfielder tel loin Reds an buai - zaninah pawh a inlan hman a la beisei­awm chuang lo. Arsenal tan chanchin lawmawm a ni.

Damlohna avanga Reds-in Spain-a an training camp aṭanga an thawn haw Daniel Sturridge dam tawh mah se bench-ah hun a hman a rinawm zawk a, Dejan Lovren chu Joel Matip nen khelmual laia inkawp turin a lo kir leh tawh beisei a ni bawk.

Arsenal lamin chanchin lawm­­awm an nei a, tun thla tira Watford laka inhliam Aaron Ramsey chu Liverpool hma­chhawn turin a dam tawh a, Bayern Munich an hmachhawn ṭuma inhliam Lau­rent Koscielny chu An­field-ah lo kir theih beisei a ni.