Mapuia Cricket League Vawiinah khelh ṭan a ni dawn
Mizoram cricket inelna ngaihhlut Mapuia Cricket League chu vawiin chawhma dar 9:30 hian Suaka Memorial Cricket Ground, Sihmuiah khelh ṭan a ni dawn. Inkhel hmasa berah Chanmarians leh Chhinga Veng an inhmachhawn ang a, chawhnu dar 12:30-ah Kulikawn leh Armed Veng-in lian zawk nih an inchuh bawk ang.
Champion lai Chanmarians
Mapuia Cricket League champion lai chu Chanmarians an ni a, an nomawi humhim an tumna kawnga an hmachhawn hmasak ber tur chu sum hmang tam Chhinga Veng an ni. Team pahnih intawn tawhna thlirin Chanmarians hi chesual thei an ni.
Nikumah Chanmarians hian MCL, Presidents Cup leh 1st division cricket inelnaah match 13 chhung tlawm hmel hmu loin an kaltluang a, an kaltluang lai titawptu chu Chhinga Veng an ni. 3C (Chhinga Veng sawina) hian MCL-a khel tur players lakluh nan Rs 43900 ngawt an insen belh leh tawh avangin nikuma Chanmari club an hneh ṭum ai mahin an ṭha tawh zawk - Chanmarians tan fimkhur a finthlak ang.
Kulikawn hmaah Armed Veng
Kum 2013 leh 2014 Mapuia Cricket League-ah a zawnin Kulikawn an champion a, Mahuma Memorial Cricket Tournament champion lai an ni bawk. Mizoram cricket-a an sulhnu en chuan Kulikawn hi chak tura rinkai zawk an ni a, MCL players auction-a sum sen dan en erawh chuan Armed Veng an chungnung zawk.
Armed Veng hi 1st Division club ni lo chunga MCL khel tur awmchhun an ni a, season hmasa khan hmunruak awm chu kum hnih chhung atan an lei. Players lilamna lamah pawh a tikimtu ringawt nih an duh lo tih pholangin players lakluh nan Rs 45,100 ngawt an inseng a, Kulikawn tan zuam sual theih tur an ni.