East Bengal kan hlau lo - Isaac Vanmalsawma
Chennai City sawp zo hlim Shillong Lajong chuan vawiin tlai dar 4:35-ah I League match khel turin East Bengal an mikhual dawn a, Chennai laka free kick goal ropui khungtu Isaac Vanmalsawma chuan Kolkata club an huphurh loh thu a sawi.
Isaac-a zam lo
AFC Cup qualifier khel tur India probable squad-a koh Isaac chuan, "Kan khelmuala khel tur kan nih avangin chakna chance kan nei ṭha zawk a, point thum hlawhchhuah ngei kan tum ang," tiin Vanglaini palai hnenah a sawi a, Kolkata khawpuia 1-1 a an lo inhnehtawkpui tawh club lakah tlawm a tum lo.
I League match 10 a khelha goal khat khunga assist vawi ruk nei tawh Hnahthial rawlthar chuan a chet ṭhat chhawm nun zel a tum thu sawi nghalin, "Pathianin ka rin phak bakin min chawisang a, rim taka thawh chhunzawm hi ka tih ve tur chu a ni. India squad-a tel ka phu tih hi East Bengal lakah pawh pho lan ka tum a, engkim hi ka tan chuan chona thar vek a ni," a ti a, a phur hle.
Lajong tan Isaac bakah hian tun hnaia hmun pawimawh chang ṭhin Samuel Lalmuanpuia te chuan inkhel bul an ṭan beisei a ni - Zemabawk North rawlthar Samuel-a hi an intawn hmasak
ṭuma Lajong tana goal khungtu a ni.
Didika a inhliam
Shillong-ah Lalrindika Ralte leh Robert Lalthlamuana te zin mah se Mizo tlangval pahnih hi practice na lamah an insut palh avangin Didika a inlan thei lo mai thei. Lunglei tlangval chuan, "Inkhel bul ka ṭan chu a rinawm loh sa a, ka dinhmun a zirin squad-a awm loh hial pawh ka dil a ngai mai thei," tiin Vanglaini palai a hrilh.
Didika chuan inkhel tur thlir nghalin, "Lajong hi an khelmualah khelh an harsa ṭhin a, kan tan chak chiang saa indah a harsa. Mahse, champion kan duh a, chu rilru pu chuan kan khel ang," a ti a, Meghalaya club hmachhawn turin an rilru a inpeih tawh thu a sawi. Red and Gold hian an match hnuhnung berah champion lai Bengaluru FC chu 3-1 zetin an hneh a, NorthEast-ah erawh result ṭha neih chhunzawm a awl lo ang.
Goa-ah Jeje
Zanin I League inkhel dangah coach thar Derrick Pereira hnuaia harhtharna chang mek Churchill Brothers chuan Mohun Bagan an mikhual dawn a, Mizo tlangval Jeje chuan Goa-ah inkhel hautak an hmachhawn a rin thu a sawi.
Hnahthial tlangval Jeje chuan, "DSK hneh hlim an ni a, coach thar Derrick hi Indian football hrechiangtu a nih bawk avangin kan tan a harsa dawn a ni," tiin Vanglaini palai a hrilh.
Team pahnih inhmachhawn hmasakah Kolkata club-in 1-0 in hnehna an chang a, mah se coach thar hnuaia an match hnihah Goa club-in goal sarih an khung theih avangin Jeje-a a ṭawng uang duh lo hi a mak lo.