Dubai Open-ah Andy Murray-a'n semifinal a lut

Andy Murray chuan Philipp Kohl­schreiber hnehin Dubai Open se­mi­final a lut. Ningani zing khan world number 1 Murray hian 6-7 (4-7), 7-6 (20-18), 6-1 in hnehna a chang hram.

Murray hian set khat­­­na a hloh hnuah set hnihnaah Kohlschreiber-a'n match point vawi sarih a hmuh tawh a pawt­­thla leh a, set hnihna tie break hi minute 31 chhung zet an khel! Set thumna erawh minute 30 chhung lekin Britain tlang­val hian a la tlang thung.

Kum 29-a upa Murray chuan, "Tennis ka khelh hun chhungin hetiang em em a rei tie break ka la khel ngai lo. Kum 11-12 chhung vel ngawrh takin ka inkhel tawh a, hetiang a match dangdai tak hi a la thleng ngai lo," tiin a sawi.

Murray hian Dubai Open nomawi hi tun hma­in a la chawi ngai lo a, kum 2012 khan final lutin Roger Federer a ngam lo. Kuminah tournament hmasa Australian Open-ah beisei phak lo mah se a khel ṭha chho leh tawh hle - Dubai-ah hian match thum khel tawhin set khat chiah a la hloh.

Grand Slam vawi thum champion tawh Murray hian semifinal-ah Lucas Pouille a hmachhawn leh ang. World number 7 Pouille hian Roger Federer hnehtu Evgeny Donskoy chu 6-4, 5-7, 7-6 (7-2) in a lo hneh ve bawk. Semifinal lehlamah Fernando Verdasco leh Robin Haase te an inhma­chhawn bawk ang.