La Liga Barca leh Real tan chetsual a thiang lo

Luis Enrique-a'n season tawpa a contract tawp tur a pawh sei dawn loh thu a sawi a, Spanish manager thutlukna hian Barcelona player-te ngei pawh a barakhaih. Catalan club hian zanin dar 1: 15-ah Celta Vigo an mikhual dawn a, La Liga lama an hnuai chiaha awm Real Madrid-in dar 8:45-ah Eibar an lenchilh hmasa ang - Spanish club lian pahnihte hian league nomawi chawi an duh a nih chuan chetsual a hun tawh lo.

Fimkhur a ngai

Nikum October 3 khan Bar­celona hi Celta Vigo khel­mualah 4-3 in an lo chesual tawh a, tun season league match bika an intawn vawi hnihna tur hi Barca player te tan manager hmalam hun avanga boruak danglam an tawn hnua an match hmasa ber tur a nih avangin an fimkhur a ṭul hle ang.

Catalan club hian league match 25 khelh tawh aṭangin point 57 an hmu tawh a, an elpui leh hmelma ni bawk Real Madrid aiin point khatin an sang zawk - mahse, match khatin an khelh tam zawk avangin an dinhmun hi duhawm tak anga sawi theih a la ni lo.

Barca hian an league match hnuhnung berah Sporting Gijon 6-1 in an sawp a, a zawna match nga chhung hnehna an channa chiah a ni. Barca hian tun hnai an legue match hnuhnung 18-ah chak loh an nei lo. Thawhlehni zan maiah 4-0 a an ngam tawh loh Paris St-Germain nen Champions League last 16 second leg an khelh leh tawh dawn avangin Celta Vigo hneh hi French club mikhual tura inbuatsaihna ṭha ber a ni ang.

Sporting Gijon an hneh ṭuma goal hnih khungtu Luis Suarez chuan, "Thudik tak chu kan manager thutlukna khan min barakhaih vek tih hi a ni. Mahse, a duhthlanna a ni a, kan pawmin kan hrethiam tur a ni. Manager hna hi khelmualah chauh ni loin ngaihtuah tur a tam em em a, a hahthlak hle ang tih a chiang," a ti.

Uruguay international stri­ker chuan sawi chhunzawmin, "Mi tam takin Barcelona hi tlachhia leh zuai ta angin an sawi ṭhin. Keni erawh chu eng­tiklai mahin kan nguai ngai lo. A hniam zawka kan awm lai pawhin beisei nei tak chungin hmalam kan thlir hram hram ṭhin. Inkhel hautak kan la hmachhawn hnem dawn a, chutihrualin kan kutah thil tam zawk chu a innghat tawh," tiin a sawi.

Real harh an ngai

Real Madrid defender Mar­celo-a'n league nomawi an chawi leh chawi loh chu an kuta a awm tawh thu a sawi a, Brazil international thusawi hnua an match hmasa berah an mikhual Las Palmas nen 3-3 in an inhnehtawk. Marcelo thusawi hi a la sual chuang lo a, mah se zaninah Eibar lakah point an hloh leh a nih a, an elpui Barca an chak a nih si chuan an kutah a awm tawh dawn lo.

Zinedine Zidane-a'n season hmasa khan Real Madrid a enkawl ṭan a, a season khatnaah Champions League nomawi a chawipui nghal. Kum 2012 hnua a vawi khat nan tun season-ah league nomawi chawi an beisei mek a, tun hnai­ah erawh beisei an phak lo.

Real hi Valencia 2-1 a an hneh loh hnuah Villarreal lakah goal hnih an phurh zet hnuah 3-2 in an lehthal leh hram a, an match hnuhnung berah Las Palmas lakah point khat an hlawh chhuak hram.

Zidane chuan, "League no­mawi chawi chu vawileh­khata chet ṭhat thut a ni ber lo a, hun rei tak chhung ngelnghet taka kal theih a ni. Season tawp thlen a harsa vek tawh dawn a, huaisen takin kan hmachhawn tur a ni ang," tiin league chu marathon ang a nih thu a sawi.

Sevilla hre reng rawh

Barcelona leh Real Madrid te karah Atletico Madrid-in league nomawi an chawi thei tawh a, tun seasaon-ah Spanish club lian pahnih karah Sevilla hi thil mak ti thei dinhmunah an ding ve leh mek.

Sevilla hian Ningani zan khan Vicente Iborra goal khat khung hmangin an mikhual Athletic Bilbao chu 1-0 in an hneh. Jorge Sampaoli naute hian point 55 an hmu ta a, khelh zat inangah Barca an phak lohna chu point hnih chiah a ni - Thawhṭanni zan dar 1:15-ah Deportivo Alaves an hmachhawn ve leh ang.