Quarterfinal-ah Djokovic a tla

World number 2 Novak Djo­kovic chu nimin khan Mexican Open quarterfinal aṭanga vuak tlak a ni. Seeded pakhatna Djokovic hi Nick Kyrgios lakah 7-6(11-9), 7-5 in a chak lo.

Australian rawlthar Kyrgios hian Djokovic lakah vawi 25 zet aces a siam thei a, darkar khat leh minute 47 chhunga an inkhelh hnuah a service ṭhat chhawr ṭangkaiin hnehna a chang.

Kum 21-a upa Kyrgios chuan, "Mipui khan Novak an ṭan tih ka hria a, a nihna takah chuan ka zam ve hle. Khawvela player ṭha berte zinga mi kan hmachhawn a nih chuan nidanga ka khelh aiin khelh ṭhat a ngai a, chutihrualin vanneihna neih tel a ngai bawk," tiin a sawi.

Grand Slam vawi 12 champion tawh Djokovic hian nikum French Open nomawi a chawi hnuah beisei a phak leh tawh rih lo a, ATP ranking-a a nihna pawh Andy Murray lakah a hloh tawh. Kumin January thla khan Murray hnehin Qatar-ah nomawi a chawi a, hemi hnuah Australian Open leh Mexico-ah erawh beisei a phak lo.

Inkhel dangah Rafael Nadal chuan Mexican Open-ah player ṭha bik a nihzia a lantir chhunzawm zel. Seeded pahnihna hian Ningani zan khan Yoshihito Nishioka 7-6(2), 6-3 a hnehin semifinal a lut.

Grand Slam vawi 14 champion tawh Nadal hian kum 2005 leh 2013 khan Mexican Open hi khelin a champion ve ve. ATP 500 tournament-ah hian match 13 a khelh tawhah chak loh a nei lo, a chak fai vek.

Kum 30-a upa Nadal chuan, "He hmuna inkhelh hi chu engtiklai pawhin a hluin a nuam. Round hmasa lamah khan ṭha takin ka khel tawh a, Nishioka lakah duhthusama ṭhain khel lo mah ila ka chak hram - semifinal ka lut thei hi ka lawm hle," tiin a sawi.

Spain tlangval Nadal hian US Open champion hlui Maric Cilic a hmachhawn leh ang. Croatian star Cilic hi quarterfinal-a a khingpui tur Steve Johnson chu a kerek hliam vangin a inhnukdawk a, semifinal khel turin hahchawlhna hun a neih belh theih phah.