Torres dinhmun a ṭha
Atletico Madrid chuan an striker Fernando Torres chu an hlauhthawn ang em em chuan a hliam na lo a, tunah chun a dinhmun a ṭhat tawh rih thu an sawi.
Ningani zan La Liga inkhelah Atletico leh Deportivo te 1-1 in an inhnehtawk a, Florin Andone goal khung chu Antoine Griezmann-a'n yard 30 a hla aṭangin a sut - inkhel result aia sawi zui hlawh chu Torres inhliam a ni.
Liverpool striker hlui Torres hi Deportivo defender Alex Bergantinos nen minute 85-naah ball kang an inchuhna lamah a lu vit zawngin a tla a, a bul hnaia player awm ten damdawi lam thiam puihna an koh nasat dan aṭanga enin a dinhmun a ṭha lo tih a chiang.
Kum 32-a upa Torres hi khelmual chhungah doctor ten an bawihsawm hnuah damdawi inah hruai a ni a, nimin khan a hliam hi endik niin he thu buatsaih lai hian a dinhmun chiang takin kan hre hman lo.
Atletico coach Diego Simeone chuan, "A tlu kan hmuh khan kan hlauthawng a, kan chiai hle bawk," a ti. Atletico goal awmchhun khungtu Griezmann chuan Torres hliam chu an inkhel result ai pawha an ngaihven zawk hiala a hriat thu leh, dam chhuak leh thuai tura a duhsak thu a sawi ve bawk.
Atletico Madrid chuan nimin khan thuchhuah siamin,"Torres-a'n a luah hliam a tuar a, damdawi inah riahpui niin a hliam hi endik zui a ni ang. Tunah chuan nikhua a hria a, a dinhmun a ṭha bawk," an ti.
Tun season-a goal nga khung tawh Torres chuan, "Hlauhna vanga nasat hmel a ni a, ka lo kir leh thuai theih ka beisei," tiin a tira an hlauhthawn ang em em a dinhmun ṭha lo a nih loh thu a sawi ve bawk.