IPL-ah team ṭha ber Gujarat Titans an champion

Indian Premier League vawi 15-na chu Pathianni zan khan Narendra Modi Stadium, Ahmedabad-ah a hmawr bawkna neih a ni a, team thar Gujarat Titans chuan Rajasthan Royals hnehin an champion.

Entu nuai khat chuang hmaah Rajasthan-in an bat hmasa a, 130/9 runs chauh an siam. Hardik Pandya hoin Gujarat hian over 18.1-ah 133/3 runs an siam a, hnehna an chang. English batter Jos Buttler chuan Rajasthan champion pui thei lo mah se a phu ang ngeiin Most Valuable Player-ah thlan a ni.

Final chu
Khawvela cricket stadium lian berah entu an khat vek a, halmawi leh stadium cheina chi hrang hrang nen mit a tlai hle. Rajasthan Royals-in qualifier 1-a an hneh tawh loh Gujarat Titans lakah phuba lakna remchang an nei a, ṭhumvawrah a vannei zawkah an ṭang bawk.

Rajasthan hian bat hmasak an thlang a, tun inelnaa run siam tam ber Buttler leh Yashasvi Jaiswal ten bul an ṭan. Royals hian tum mumal tak an nei a, Jaiswal chu ball vawtuah hmangin Buttler-a hna chu fimkhur taka a kawppui thlawp a ni.

Royals-in bul an ṭan chhe lo a, over liah 31 runs siam hman mah se Yash Dayal-a'n over lina ball tawp berah Jaiswal a vawm hlum. Hemi hnu hi chuan Gujarat an che ṭha a, Rajasthan erawh an insiamrem thei lo.

Sanju Samson-a'n 14 runs bak a siam thei lo a, Hardik Pandya lakah an zawr. Gujarat captain hian Samson bakah player pawimawh dang Buttler (39) leh Shimron Hetmyer (11) te vawm hlumin wicket thum a la a, 17 runs chauh a pe.

Afghanistan bowler Rashid Khan pawh a che ṭha a, Royals batter-ten a ball vawm vuak harsa an ti. Rashid hian Devdutt Padikkal a vawm hlum a, over 20-ah 18 runs chauh a pe. Kum 25 mi Ravisrinivasan Sai Kishore pawhin over hnih lek vawmin 20 runs pe mah se wicket hnih a la. Rajasthan-in over 20-ah 130 runs chauh an siam.

Titans bat hun a thleng a, Wriddhiman Saha-a'n run nga chauh a siam tihin pavillion lamah kir leh mah se opener Shubman Gill-a'n thi loin 45 runs a siam Captain Hardik Pandya-a'n 34 runs a siam a, David Miller-a'n thi loin 32 runs siam bawkin over 18.1-ah 133 runs an siam a, wicket sarihin hnehna an chang.

An ṭha rual
IPL neih zawh takah Rajasthan batter Jos Buttler a langsar. English batter hian 17 innings aṭangin 863 runs a siam. Run siam tam berin an dawn ṭhin Orange Cap chawimawina a dawn bakah chawimawina dang Most Valuable Player atan thlan a ni a, six leh four vaw hnem ber a ni a, Game-changer of the season leh Powerplayer of the season te a dawng.

Buttler hian IPL season khata run siam tam ber record erawh a siam thei ta lo. India captain hlui Virat Kohli-a'n season khatah 973 runs tehmeuh a siam tawh a, Kohli record dinglai hi a ding chhunzawm dawn.

Rajasthan bowler Yuzvendra Chahal-a'n wicket 27 lain tun inelnaa wicket la hnem ber a ni. Gujarat lamin mimal chawimawina lian tham la lo mah se a pawimawh ber champion nomawi an chawi.

India opener hlui VVS Laxman chuan, "Match tinah 'hero' thar an awm zel. Team thar tan an thil tawn hi duhthusam a ni a, ka lawmpui takzet e," tiin a sawi. Gujarat hi league round-ah pakhatna an ni a, team angin an khel ṭha a, captain Hardik Pandya-a'n fak a phu.

England captain hlui Michael Vaughan chuan, "Team thar tan an hnathawh hi a ropui hle. India hian captain thar a mamawh a nih chuan Hardik Pandya hi en kan a rem lo ang. Gujarat in ti ṭha e," tiin a sawi ve bawk.