Premier League-ah Forest an lo kir e

Football khawvelin thawnthu ngaihnawm tam tak a lo hre tawh ṭhin a, ṭhenkhat chu chhiar nawn ninawm loh, chhiar tawh pawha chhiar nawn leh ngai an ni ṭhin.

Chutianga thawnthu ngaihnawm leh danglam bik chu football khawvelin min pe leh ta a, Nottingham Forest chuan kum 23 hnua a vawi khat nan Premier League an khel ve leh dawn ta.

Tun season Championship an match hmasa pasarih aṭanga point khat chiah hlawh chhuak Forest-in football khawvela comeback ropui ber pawl an lantir a, season tharah Premier League an khel dawn!

Forest hian playoff final-ah Huddersfield Town chu 1-0 in an hneh a, Huddersfield centre back Levi Colwill chuan inkhela goal awmchhun hi an lamah a tilut - muttui a harsa rih ang.

Reds an vannei
Wembley Stadium-a inkhelah chungnung zawk sawi tur an awm lo a, Nottingham Forest-in hnehna chang mah se chak phu zawk tia sawi tur an awm lo - a tawpah a vannei zawk an chak.

Goal awmchhun hi minute 43-naa lut a ni a, Manchester United aṭanga Forest-a loan-a khel James Garner-a ball cross chu Colwill chuan an lamah a ti lut - kum 19 mi Colwill hi Chelsea aṭanga Huddersfield-in loan-a an hawh a ni.

Town tan Harry Toffolo chuan penalty hmuh inbeisei mah se season tawp ruala chawl tawh tur referee Jon Moss chuan penalty-ah a ngai lo a, Toffolo hi a tluk der avangin yellow card zawk a hmuh.

Video assistant referee hmanga ennawn a nih hnuah Forest midfielder Jack Colback chuan Toffolo hi a lo tawk fuh ngei niin a lang a, mahse, referee-in a thutlukna a sut lo.

Terriers an vanduai
Huddersfield-in Toffolo hmanga penalty hlawhchhuah an beisei an hmu lo a, Max Lowe-a'n a tih tluk vangin Lewis O'Brien-a'n penalty hmuh a beisei chungin pek a ni lo bawk.

Terriers (Huddersfield sawina) hian November-a an match hnuhnung berah an mikhual Middlesbrough chu 1-2 in an ngam lo a, table-ah pariatna an ni a, an tan Premier League a la hla hle. Mahse, hemi hnua an league match 17-ah a zawnin tlawm an nei lo a, Championship-ah season khata tlawm nei loa kaltluang rei ber record thar an siam.

Huddersfield hi sum inseng ṭeuh si loin transfer lamah an che fuh hle bawk - MK Dons keeper Lee Nicholls (free) leh Sheffield Wednesday aṭanga free-a an lak Tom Lees an ṭangkaipui a, January 2021-a non-league club Boreham Wood aṭanga an lakluh Sorba Thomas pawhin league-ah goal thum leh assist 13 neiin a ṭangkai hle.

Mahse, a tawpah Huddersfield an vanduai a, Premier League an kai zo ta lo - table-ah pathumna ni a, automatic promotion an phak ta lote kha an thlirkir ang a, an ui vawng vawng ang.

Fak tlak Cooper
European Cup champion vawi hnih lo ni tawh Nottingham Forest-in kum 1999 hnua a vawi khat nan Premier League an khel leh dawn a, fak tur an awm a nih chuan fak tur chu Steve Cooper a ni ang.

Forest hian an league match hmasa pasarih aṭangin point khat chiah an hlawh chhuak a, coach Chris Hughton chu September khan a hna aṭangin an chawlhtir hial - kum 108 chhunga season an ṭan chhiat ber ṭum an tawng.

Mahse, Forest-in thutlukna an siam fuh - September 21 khan Hughton thlak turin Steve Cooper an lalut a, a league match hmasa pangaah vawi li hnehna chanpuiin, vawi khat draw result a hlawhchhuahpui nghal.

Forest hian hemi hnuah hian tlawm leh a changa tluk chang nei ve bawk mah se an tho leh thei zel a, season a tawp meuh chuan table-ah palina an ni a, playoff khel tura inpetkaiin Premier League meuh an thleng ta.

Hei hi kan in a ni!
Kum 1865-a din tawh Forest-in Arsenal leh Manchester City la champion ve lohna European Cup/Champions League nomawi ringawt pawh pahnih an hlawh chhuak tawh a, 1977-78 season khan first division champion an ni bawk.

An sulhnu thlirin Forest hi club lian tak an ni a, mahse, English top flight league khel loa an awm rei avangin ṭhangthar football fans zingah hre lo an awm a nih pawhin an demawm hran loh.

Nottingham boss Steve Cooper chuan, "Club hlun tak, sulhnu leh thawnthu tam tak nei kan ni a, chu kan ropuina nen chuan inchhuang takin kan ding a ni," a ti a, Forest chu club ropui an nih thu a sawi.

Cooper chuan sawi zawmin, "Hma-sawn i tum ang u, tiin ka sawi fo ṭhin a, chu chu kan tithei a ni. He club nena inzawm zawng zawngte tan vawiin hi hun lawmawm a ni a, he club awmna hmun Premier League-a kir hi an phu a ni," a ti.

A ngaihnawm
Forest hi kum 2005-ah phei kha chuan League One-ah an tla thla hial a, European Cup champion zinga mahni rama third division inelnaa tla thla hmasa ber an ni - an record hi a duhawm lo hle.

Kum 1977 khan Forest hi second division aṭangin first division-ah an inpetkai a, an champion zui - hemi hnu hian coach ropui Brian Clough hoin Europe-ah a zawnin an champion a, an vanglai tak tak a ni.

Mahse, khang zawng zawng kha thawnthu hlui an chang tawh a, tunah chuan Premier League-ah an kir ve leh dawn ta. Manchester City leh Liverpool te nen an inel tawh dawn avangin hman ang erawh chuan champion nghal beisei chi a ni lo ang.

Kum 30 hnua Wembley-a an inlan leh hmasak bera Premier League kir tura chak thei Forest hian FA Cup-ah pawh Arsenal leh Leicester City an hneh a, Pathianni zana an hneh tak Huddersfield pawh fifth round-ah an hneh a, quarterfinal-ah champion Liverpool an ngam lo - an season hman danah inchhuang tur an ni.