Eastern Conference chamion Boston Celtics An hmabak chu Golden State Warriors
Dawhthei takin an nghak a, tluk leh din fawma kal chang an nei - kum 12 chhung an nghah hnuah Boston Celtics hun a inher chhuak ve leh ta. Celtics hian Miami Heat chu 100-96 a hnehin NBA Eastern Conference champion an ni.
Ime Udoka-a enkawl Boston Celtics hian NBA Finals-ah chuan Golden State Warriors an hmachhawn dawn. June 2, Ningani zing dar 6:30 hian anmahni khelmual FD Garden-ah game 1 an khel chhunzawm leh nghal dawn.
Heat aia sa zawk
Boston Celtics leh Miami Heat te an inkhel tawk takzet a, game hnuhnung ber khelh a nih thlengin tlang zawk tur rinthiam a harsa. Khualmualah an chak thei tih game hmasa lamah an lantir ve ve tawh, chuvangin an inbuktawk tih a chiang.
Game 7 khelhna hi FTX Arena a ni a, a neitu chu Miami Heat an ni. Mahni muala khel ni mah se Heat lamin bul an ṭan fuh lo, quarter hmasa berah 32-17 ngawtin an hnufual nghal a, conference champion ni turin leihlawn lawn tur hautak tak an insiam chawp.
Quarter hnihna an khelh chhunzawm lai pawhin Celtics hian point 17 ten hma an hruai fal thei, amaherawhchu Heat an tlawm duh bik lo. Inkhel tawp nana second 40 chauh a awm tawh chuan, an inkarah point hnih chiah a awm hman.
Mahse, hun tawp dawn boruak sangah Boston Celtics bawk an che fuh a, point thum neih belh lehin chak an nemnghet. Hnehna an chan theih nan Series MVP atana thlan Jayson Tatum chuan point 26 a neih bakah rebound vawi 10 a la bawk.
Celtics tak tak
Basketball inelna sang leh lian ber NBA-ah hian Boston Celtics leh Los Angeles Lakers te hi record nei ṭha ber an ni a, vawi 17 tehmeuh ve ve an champion tawh. An champion hnuhnun ber erawh a rei deuh tawh, 2008 daih tawh kha a ni.
Celtics coach Ime Udoka chuan, "Tuna kan awm dan hi Boston Celtics nihna dik tak chu a ni. Season tir aṭangin theihtawp kan chhuah a, hun harsa leh hrehawm tam tak pawh kan paltlang, tun hun hi awlsam taka thleng kan ni lo.
"Tunah chuan NBA Finals kan thlir a ngai, tun aia inkhel hautak zawk hmachhawn tura kan inbuatsaih chhunzawm a ngai," a ti. Western Conference champion Golden State hian player ṭha an ngah a, chuvangin Udoka a ṭawng fimkhur hi a mak hran lo.
Celtics tan GSW hi hneh theih loh tur erawh an ni bik lo. Regular season lai khan vawi khat ve ve an inhneh tawh, chuvangin champion tur zawk sawi lawk a harsa. Tatum bakah Jaylen Brown leh Marcus Smart an la nei bawk a, champion tum ngam turin an ṭha tawk.
Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
Game 3: Boston Celtics 103 - 109 Miami Heat
Game 4: Boston Celtics 102 - 82 Miami Heat
Game 5: Miami Heat 80 - 93 Boston Celtics
Game 6: Boston Celtics 103 - 111 Miami Heat
Game 7: Miami Heat 96 - 100 Boston Celtics
(Boston Celtics hian 4-3 in series an la)
NBA Finals Fixtures
June 2, Ningani
Game 1: Boston Celtics 06:30 AM Golden State Warriors
June 5, Pathianni
Game 2: Boston Celtics 05:30 AM Golden State Warriors
June 8, Nilaini
Game 3: Golden State Warriors 06:00 AM Boston Celtics
June 9, Zirtawpni
Game 4: Golden State Warriors 06:00 AM Boston Celtics
June 13, Thawhṭanni
Game 5: Boston Celtics 06:30 AM Golden State Warriors
June 16, Ningani
Game 6: Golden State Warriors 06:00 AM Boston Celtics
June 19, Pathianni
Game 7: Boston Celtics 06:30 AM Golden State Warriors