Liverpool-in champion an lawm

FA Cup leh League Cup champion Liverpool-in uiawm taka Premier League leh Champions League nomawi an chawi theih tak loh chu an theihnghilh a, Thawhṭanni khan bus nen champion lawmin Liverpool khawpui an fang.

Liverpool khawpuiah fans sang tel pungkhawmin an club hlawhtlinna an lawmpui a, a hma zan lawka Champions League final-a an tlawmna chu tuman an ngaihtuah duh tawh lo.

Reds kawng zawhah hian Liverpool hmeichhe team an tel bawk a, anni hi April khan Women's Championship-ah an champion a, season thara FA Women's Super League khel tur team hian mipa team rualin an champion an lawm ve a ni.

Liverpool mayor Joanne Anderson chuan, "Liverpool player-te hian inchhuang takin min awmtir a ni," a ti a, Reds manager Jurgen Klopp chuan, "Ka naute ka chhuang a, heti zat rawn fuankhawm mipuite ka chhuang lehzual a ni," tiin a sawi ve bawk.

Klopp chuan sawi zawmin, "A hma zan lawkah Champions League final-ah kan chak lo a, heti zat mipui hi hlim takin an lo pungkhawm leh thei a ni.

"A ropui ka ti takzet a, midang ngaihdan ka ngaihtuah lo - he club hi khawvela ṭha ber a ni," a ti a, German coach hian Merseyside club hi nuam a ti hle.

Kum 54 mi Klopp chuan, "Nomawi hnuhnung pahnih kan la thei lo a, mahse, heng mipuite hian kan hnathawh an theihnghilh lo. Ka nauten an theihna zawng zawng an hlan tih an hria a, kan hmachhawp atan phurna nasa tak min pe dawn a ni," a ti.

Reds defender Trent Alexander-Arnold chuan, "Engtiang takin nge fan-ten min lo hmuah dawn thlir lawk thiam a har a, mahse, a ropui takzet a ni," a ti a, captain Jordan Henderson chuan, "Kan tana an hnathawh zawng zawngah fan-te hi lawmthu hrilh kan ba a ni," tiin a sawi ve bawk.

Reds hi FA Cup leh League Cup-ah an champion a, Premier League-ah point khata Manchester City phak loin an champion zo lo a, Champions League final-ah Real Madrid chu 1-0 in an ngam lo bawk a ni.