Nadal hmaah Djokovic a ding dawn

French Open final a la ni lo, quarterfinal chauh a la ni - mahse Rafael Nadal leh Novak Djokovic te an inhmachhawn tawh dawn, zanin hian Paris khawpui chuan tennis inkhel hmuhnawm bik a thleng dawn tihna a ni.

Champion lai Djokovic-a'n set hloh loin last 16 a paltlang thei a, inkhel dangah Nadal erawhin fiahna hautak a paltlang thung. Spanish star hian set nga an khelh hnuah Felix Auger-Aliassime chu harsa takin a paltlang hram.

Nadal leh Djokovic chauh a ni lo, quarterfinal inkhel dangah Alexander Zverev leh Carlos Alcaraz te an intum dawn bawk. Spanish rawlthar Alcaraz hi champion tura rinkai zinga mi a ni phak, clay court-a inkhel thiam pahnih intawng tur hi a hmuhnawm dawn.

Nadal nge nge
Roland Garros a nih chuan Nadal hi chak tura rinkai a ni nghal ngawt ṭhin. Pathianni zan last 16 inkhelah erawh set a hloh hmasa, a tawpah erawh seeded pakuana Auger-Aliassime lakah 3-6, 6-3, 6-2, 3-6, 6-3 in a chungnung zawkah a ṭang thei hram.

Paris khawpuiah Nadal-a'n match 112 a khel tawh a, heng zinga 109-ah chuan hnehna a chang. Court Philippe-Chatrier-ah hian a dinhmun a hniam lai pawhin fans puihna a dawng ṭha, a tawp lama a service lai phei chuan mipui thawm a ṭha takzet.

Zirtawpnia kum 36 tling tur Nadal chuan, "Ka sawi theih awmchhun chu a tawp thlengin ka bei tur a ni tih hi a ni," a ti. Ke phah hliam damkawr ni mah se Rafa hian fiahna hmasa a paltang thei a, a hmabak erawh a hautak dawn.

Grand Slam vawi 21 champion tawh Nadal hian a tir lamah forehand tihsual a ngal, set hnihna aṭang erawhin a insiam ṭha. Inelna sangah chuan mahni tihsual avanga khingpuite point pek hi a pawi zual ṭhin - Djokovic lakah chuan tihsual neih tlem a ngai ang.

Novak chak chiang
World number 1 Novak Djokovic hmaa ding hi Diego Schwartman a ni a, seeded 15-na lai ni phak mah se Novak tan harsatna a awm lo; 6-1, 6-3, 6-3 in a hneh a, tun tournament khelh laiah set a la hloh miah lo.

Nadal ang bawkin Djokovic hian ṭantu a nei ṭha. Court Suzanne Lenglen-ah Novak ṭantute thawm a ring a, 2020 semifinalist Schwartzman a che thei lo a, inkhelh banah a khingpui chu player hmachhawn harsa bik a nih thu a sawi zui bawk.

Serbian star pawhin a khingpui hi fak zuiin, "Schwartzman hi court chhung leh pawnah mi ṭha tak a ni a, ka zah hle. Clay court hi a inkhelh thiamna hmun a ni a, tun ṭumah erawh a vannei zawk ka ni," tiin a ṭawng uang duh bik lo.

Grand Slam chawi hnem lamah Djokovic hian Nadal umphak turin vawi khat champion a la mamawh, record nihrual a duh a nih chuan Nadal hneh chung ngeia semifinal a invuak kai a ngai dawn, hna awlsam erawh a ni bik lo ang.