Monaco-ah Perez leh Red Bull an che fuh
Monaco Grand Prix hi chuan chanchin danglam tak hi a nei ṭhin, qualifying lama che ṭha hi a takah a ṭha ber an nih loh chang a tam - chetsualna leh harsa tak kara intlan pelhna thleng ṭhin hian a boruak a ti sosang ṭhin viau bawk.
Season dang ang bawkin kumin Monaco GP pawh a boruak a nung. Ferrari aiin Red Bull lam ral rel a fuh zawk a, chak tura ngaih Charles Leclerc chu palina a nih laiin Sergio Perez chu a hmasa bera thlengin hnehna hlado a chham thung.
Mercedes an la che fuh thei lo tluang zel. Vawi sarih champion tawh Lewis Hamilton chu pariatnaah a thleng a, a teammate George Russell chu pangana a ni thung. An tan Red Bull leh Ferrari te elphak a harsa rih a, insiamṭhat an mamawh takzet.
Champion lai Max Verstappen-a'n point 125 hmuin championship table-ah hma a hruai chhunzawm, season hmang ṭha Leclerc (116 points) chuan a um ve zel. Inelna a hmuhnawm chhunzawm dawn a, kal fal thei an awm rih dawn lo niin a lang.
Red Bull an fuh
Qualifying-ah chuan a ṭha ber ni lo mah se Red Bull hi a takah an che fuh leh tlat ṭhin. An driver Perez chuan pathumna aṭangin inelna hmachhawn ṭan mah se pakhatna a ni thei a, tyre thlak hun an thlan dik bakah Ferrari chet fuh loh an nang ve bawk.
Max Verstappen pawh pathumna a ni, a hmaah Carlos Sainz thleng mah se championship lama a elpui ber Leclerc hmaah a thleng thei - Dutch tlangval hian hnehna chang chiah lo mah se atan result ṭha tia chhiar theih a ni tho.
Tlankawng huh leh nalah Red Bull an che fuh a, driver an neih ṭhat bakah team lamin thutlukna an siam dik tih a takin kan hmu. Season hmasa hmawr bawknaah Mercedes an hneh tawh bawk, tun hnaia team chet ṭhat dan hi sawi nep theih a ni lo.
Tihsual a tam
Season ṭan dawn khan Ferrari hi rinkai ber an ni lo mai thei, amaherawhchu Italian team hlun hian inelna an hmang ṭha. Team ṭha pahnih Red Bull leh Mercedes te ai pawhin car an nei chak zawk niin a lang, tun kar tawp bikah erawh an duhthusamin thil a thleng lo thung.
Ruah sur vangin intlansiak hun pangngai aiin darkar khat chuangin an tlan ṭan har. Tualchhung tlangval Leclerc chuan, "Tihsual palh chu a awm thei, mahse tun ṭumah kha chuan tihsual kha kan nei hnem mah mah deuh niin a lang.
"Mahni tual zawlah ngei chak kha ka duh, duhthusam a thleng thei lo erawh a pawi ka ti," a ti. Leclerc hian a tirah chuan hma a hruai reng, mahse 'pit stop' an hman hun a fuh lo a, a elpui Perez-a'n lo tlan pel hmanin atan hnehna chan a harsa tawh a ni.