Tleirawl Gauff a chak zel

Tennis huangah Coco Gauff hming kan hriatna a nei tawh, a kum zat erawh 18 chauh a la ni si! American tleirawl hian hriat a hlawh hma a, a lakah pressure pawh a san phah - a hmaa chona awm erawh huaisen takin a hmachhawn mek.

Pathianni zan French Open last 16 inkhelah Gauff hian Elise Mertens chu 6-4, 6-0 in a hneh. Roland Garros-ah hian a kum zawnin quarterfinal a lut ta, a match lehpekah chuan a hnam pui Sloane Stephens a hmachhawn leh ang.

Gauff chuan, "Point khat lek hmu tur pawhin beih nasat a ngai, inthlahdah thei ka ni lo tih hi keimah leh keimah ka inhrilh nawn mawlh mawlh. Grand Slam bika chawlhkar hnihna thlen hi chu a nuam," a ti.

Grand Slam hi chawlh kar hnih chhung khelh ṭhin a ni, tournament dang erawh kar khat chhungin an khel zo ṭhin. Kar hnihna an thleng a nih chuan quarterfinal an lut phak tihna a ni a, a thiam zual pariat zinga tel chu inchhaunna tham a tling.

Inkhel dangah Gauff ang bawka tleirawl duhawm Leylah Fernandez pawh a chak. Kum 19 mi Fernandez hian Amanda Anisimova chu 6-3, 4-6, 6-3 a hnehin a vawi khat nan French Open quarterfinal a in vaw kai.

Fernandez hi a kum la tam lo mah se major tournamnet-ah a hlauhawm, season hmasa pawh khan US Open final a lut thei. Clay court inelna lianah hian a sang zual zingah a tel zel a nih pawhin a mak hran lo ang.