Saint-Etienne an relegate, fan-ten buaina an siam

Ligue 1 khel tur zawnna playoff-ah Saint Etienne chuan Ligue 2 pathumna Auxerre an hneh lo a, season tharah Ligue 2 an khel dawn. Geoffroy-Guichard-ah mualneitu St Etienne ṭantuten an lungawi lohna an lantir nghal a, khelmual chhungah lutin player-te chu halmawiin an vawm hial.

Pathianni zan khan St-Etienne leh Auxerre te hian playoff an khel a, Stade de l'Abbe-Deschamps-ah team pahnih hi 1-1 in an inhnehtawk tawh. Geoffroy-Guichard-ah pawh 1-1 thoin an inhnetawk a, Auxerre tana Hamza Sakhi goal khung (minute 51) chu Mahdi Camara hmangin minute 76-naah an sut.

Extra time-ah goal a luh belh lo a, penalty hmangin chak zawk zawn a ni. St-Etienne tana penalty pet hmasa bertu Ryad Boudebouz-a'n a hlah nghal. Player dang zawngin an pet goal vek a, Auxerre hi 5-4 in an chak.

Inkhelh zawhah St Etienne ṭantute khelmualah lutin an player-te an bei a, team pahnih player-te chu an hual avangin security-ten an hruai chhuah a ṭul hial. Police pawhin khelmuala buaina siamte hnawt darh turin 'tear gas' an hman a ṭul bawk.

Ligue 1-ah hian a hniam pahnih an relegate nghal a, Metz leh Bordeaux te Ligue 2-ah an tla thla. Table-a 18-naa awm Saint-Etienne erawhin playoff-a inhamtanna hun ṭha an nei. Ligue 2-ah hian champion Toulouse leh Ajaccio te top flight khel turin an tling nghal a, pathumna Auxerre leh an hnuaia awm Paris FC leh Sochaux ten playoff khel tur an zawng.

Sochaux hian Paris FC hi quarterfinal-ah an hneh a, semifinal-ah Auxerre hian Sochaux hi an hneh. Playoff final-ah Auxerre hian Saint-Etienne an hneh zui a, Toulouse leh Ajaccio te hnung zuiin season tharah Ligue 1 an khel dawn a ni.