Hei baka ṭha chu ka thei tawh lo - Benzema

Karim Benzema chuan tun season-ah Real Madrid tan a theihna zawng zawng a chhuah a, Ballon d'Or dawng turin hei baka ṭhaa a khelh theih tawh loh thu a sawi.

Los Blancos hian La Liga nomawi an chawi bakah Champions League-ah a vawi 14 nana champion turin Liverpool chu 1-0 in an hneh. Paris-a final khelhah hian Vinicius Junior-a'n goal awmchhun a khung a, Benzema-a'n goal khung lo mah se goal 15 ngawt khungin player langsar ber a ni.

Ballon d'Or chungchang zawhna chhangin kum 34 mi Benzema chuan, "Ngaihtuah ve bawk e. Tunah chuan kan ram team ka zawm ang. Club bikah chuan tun aia ṭha akhelh theih dan ka nei tawh lo. Engpawh thleng se, ka hnathawh ka chhuang hle," tiin a khelh danah a lungawi thu a sawi.

Benzema hian Paris Saint-Germain leh Chelsea lakah hattrick a siam ve ve a, Manchester City nena ṭum hnih an inkhelhah goal thum a khung bawk. French forward hian tun season-ah Real tan goal 44 a khung.