Rangnick-a'n Man United chhuahsan dawn

Manchester United chuan Ralf Rangnick nen consultant hna chelh chhunzawm turin inremna nei mah se German manager hian Old Trafford-ah a cham chhunzawm dawn lo. Rangnick hian team enkawl hna a chelh hnuah kum hnih cham chhunzawm tura ngaih ni mah se a chhuah thu an puang ta thung.

Pathianni khan Manchester United chuan, "Ralf Rangnick chungah thla ruk chhung rim taka thawk chunga manager lailawk hna a chelh avangin a chungah kan lawm takzet. Ralf hian Austria national team enkawl turin rilru a sawr bing dawn a, Old Trafford-ah consultancy role a chelh lo ang," tiin thuchhuah an siam a, duhsakna an hlan tel bawk.

Rangnick hi Man United manager thar Erik ten Hag nen an inbia tih hriat a ni a, Dutch manager nen hian an thawk dun thei loa ngaih a ni. Ten Hag hian May 23 khan thutawp siamtu a nih tur thu a sawi a, Rangnick hna chu club lam thuneihna a nih thu a sawi.

April 29 khan German manager khan Austria national team manager atan ruat a ni a, hetih lai hian Rangnick hian United-ah consultant hna a chelh tur thu a sawi. Hemi a nih avang hian German manager hi Ten Hag nen an thu an inhmuh loh avanga chhuak ta nia ngaih a ni.