An ramah Bagnaia a chak

Italian tlangval Francesco Bagnaia chuan an rama tlan Italian Grand Prix-ah hnehna a chang a, bike intlansiakna sang ber MotoGP rider championship huangah palina dinhmun a luah chho nghal bawk.

Ducati rider hi championship lama hmahruaitu Fabio Quartararo hmaah a thleng a, pathumna chu Aleix Espargaro a ni thung. Championship lama che ṭha lai Enea Bastianini leh Alex Rins te erawh an tlan tluan thei lo.

Intlansiak tir lamah Pol Espargaro and Joan Mir te an chesual a, lap 15 la awm aṭangin Bagnaia hian hma hruaiin season kal laia a vawi hnih nan hnehna a chang, champion beiseina pawh a nei sang thar lehnghal ang.

Kum 25 mi Bagnaia chuan, "Intlansiak lai kha ni dang ang lo takin ka au nasa, mahni ramah ngei mai hnehna chan chu a nuamin a hlu takzet. Inelna en turin fans tam tak an rawng pungkhawm a, anni nena hnehna chan chu nuam danglam tak a ni," a ti.

Italian GP-ah hian Marc Marquez pawh a inlan a, 10-naah a thleng. MotoGP vawi ruk champion tawh Marquez hi a dar leh ban ding lam zai a ni leh dawn a, zai a nih hmaa intlansiak a hmachhawn hnuhnung ber a nih rih dawn.

Spanish tlangval hi 2020 khan inelna hmasa ber Spanish Grand Prix-ah a chesual, a hliam hi zai a nih hnuah ngai a la awh leh thei lo. Tun hnaiah rawn ṭha chho viau mah se zai nawn a ngai dawn. In enkawl tur hian US-ah a kal dawn, a chawlh chen tur sawi lawk theih a la ni lo.

Honda rider Marquez chuan, "Hliam ka neih aṭang kha chuan engkim mai hi hriatthiam a harsa vek tawh mai a ni. Doctor ten theihtawp an chhuah a, beiseina pawh kan nei sang leh hman hle, mahse mihring thiamna in a tih theih chin hi a awm," a ti.