Djokovic hmaa ding tur Thiem

Australian Open 2020 final chu Pathianni tlai dar 2:00 hian Rod Laver Arena-ah khelh a ni dawn a, champion lai Novak Djokovic leh Dominic Thiem te an inhmachhawn ang.

Nimin tlai semifinal inkhel hmuhnawm takah seeded pangana Thiem chuan a elpui leh ṭhianpa ni bawk Alexander Zverev chu darkar thum leh minute 42 an inkhelh hnuah 3-6, 6-4, 7-6 (7-3), 7-6 (7-4) a hnehin a vawi khat nan Australian Open final a lut.

Austrian tlangval Thiem hian a vawi khat nan Grand Slam champion nih a tum dawn a, a khingpui tur Djokovic erawh vawi 16 champion tawh a ni. Melbourne Park bikah chauh pawh vawi sarih ngawt hlawhtlinna a chang tawh.

Ningani tlai khan semifinal hmasa zawk khelh a ni a, world number 2 Djokovic-a'n Grand Slam vawi 20 champion tawh Roger Federer hnehin final a lut. Thiem pawhin chhuan tur a nei a, quarterfinal-ah world number 1 leh seeded pakhatna ni bawk Rafael Nadal a hneh thei.

Kum 26 mi Thiem chuan, "Zverev nen khan Australian Open semifinal kan khelh vawi khatna a ni a, a bik takin bul ṭan kha a harsa hle. Grand Slam a nih hi chuan a boruak hi a danglam ṭhin a ni," a ti. French Open final vawi hnih a khelh tawhah Rafael Nadal a ngam lo a, tun ṭumah pawh Djokovic lakah a fimkhur a ngai dawn.

Austrian player zinga Australian Open final lut hmasa ber Thiem chuan sawi zawmin, "Australian Open lalpa Novak nen kan inhmachhawn dawn, a pawimawh ber chu dawhtheihna leh fimkhurna a ni ang, hnehna ka chan theih nan ka theihna zawng zawng ka hmang ang," a ti.

Grand Slam vawi 16 champion tawh Djokovic hi a champion a nih chuan major title chawi hnem lamah Federer (20 titles) leh Nadal (19) te a hnaih sawt dawn a, a khingpui tur Thiem erawh a vawi khat champion-na tur a ni thung ang.

Australian Open champion lai Novak Djokovic hi kuminah pawh nomawi hum leh thei tura ngaih a ni. Melbourne Park-ah chuan ani aia player hlauhawm leh ṭha an awm bik lo, season hmasa final-ah khan Rafael Nadal lakah game riat chauh hloh chungin a chak.

Serbian tlangval chuan, "Nikum kha chu Grand Slam final ka khelh tawh zinga ka khelh ṭhat ber ṭum a ni. Nadal ka hmachhawn tawh dawn lo a, player dang nen kan inkhelh dawn avang erawh chuan ka dinhmun tur teh lawk vak theih a ni lo.

"Inelna lian leh boruak sangah chuan tawnhriat nei lo ai chuan tawnhriat nei hnem chuan hlawkna kan nei zawk ngei ṭhin, tun hma deuh khan tawnhriat neih tam loh vanga buaina ang chu ka lo tawng ve tawh, tunah erawh ka upa tawh," tiin a inrintawk thu a sawi.

Djokovic hian Federer leh Rafael Nadal te nen chauh an inel loh thu a sawi tel, "Player naupang zawkte hun a inṭan mek a, tunah pawh hian na takin min nek chhuah tumin tha an thawh. Keichuan a theih anga rei Grand Slam champion nih ka tum ve thung ang," a ti.

•    Ṭhum vawra vannei zawk Zverev chuan a ṭhianpa Thiem chu a service hmasaktir.

•    Thiem-a'n service hmasain point hmu loin game hmasa ber a hloh, bul a ṭan fuh lo hle.

•    Zverev-a'n service hum zo loin, point khat chauh hmu chungin game a hloh ve nghal.

•    Game hnih ve ve an lak laiin 

ruah a sur a, stadium ropui Rod Laver Arena chu a chung khuhna hman a ni.

•    Zverev zawkin a service a hum bakah vawi hnih chhuhsak zui lehin set hmasa ber a la.

•    Set hnihnaah Thiem chuan service chhuhsakin 3-1 in hma a hruai a, harsa lutuk loin set a la tlang.

•    Set hnihna an khelh laklawh lai hian stadium chhunga light 

ṭhenkhat a chiang lo a, rei vak lo an chawlh a ngaih phah.

•    Service an inchhuhsak tawn hnuah tie break khelin Thiem zawkin set thumna a la.

•    An inbeih tawk vangin set lina la tur hriat a har, 6-6 thlengin service an hloh lo. Tie break khelh hnuah Thiem bawk a vannei.