Mizo mipui leh Kamo hmangin Aizawl FC chak ; East Bengal an tlo, Mohun Bagan an nghing
Aizawl FC-in Inrinni chawhnuah Mumbai FC 2-0 a hnehin I League hmahruaitu an ni. Darkar thum pawh a ral hmain East Bengal-in Shillong Lajong chu 2-1 in an hneh a, Red and Gold-in hma an hruai leh nghal.
Zan lamah Mohun Bagan-in Churchill Brothers lamah goal khung hmasa mah se Goan club-in an lehthal avangin Jeje Lalpekhlua khelhna club hi tun season-a a vawi khat nan an tlawm.
Mizo club-in RG Stadium, Mualpuiah hneh loh an la tawng lo a, an muala match riat khelh tawh aṭangin vawi sarih an chak.
Aizawl FC-in match ruk khelh hmabak an la nei a, champion lai Bengaluru FC chungah awmin East Bengal leh Mohun Bagan te nen nomawi an inchuh zel.
Mizoram lamah
Mizo mipui Mualpuiah an fuan khawm a, Aizawl FC-in East Bengal leh Chennai City an hmachhawn ṭumin RG Stadium-a leng lo mipui an pung khawm tawh a, Mumbai FC nen an inkhelh ṭum pawh hian entu an tlem lo. Au thiam lamah hmasawnna hmuh tur a awm a, mipui che vel leh hmuh a nuam a, an thawm hriat a nuam telh telh.
Aizawl FC-in ṭantu an neih ṭhat avangin Mumbai FC coach Santosh Kashyap pawh thuthar thehdarhtute hmaa a thusawiah a ding tlang ngam lo - Mohun Bagan, Royal Wahingdoh leh Salgaocar coach hlui hian Mizo tlangval Lalchhawnkima chu bul a ṭantir turin insawi mah se, 100%-a a la dam loh avangin a luhtir ngam leh lo.
Mizo club-in inkhel thunun mah se a hmawr an bawk fuh thei lo a, Aizawl FC inkhela khaipa Mahmoud al Amna leh Jayesh Rane te an hmuhnawm chungin goal khung kawngah chuan keeper Laxmikant Kattimani tan hna an siam thei lo.
R Laldanmawia ball pek duhthusam chu Amna hian a ṭhelh a, amah Danmawia pawh hian chance ṭha a hlah ve bawk.
Mipui lamin goal an duh luatah Kamo Stephane Bayi thlak an duh a, coach Khalid Jamil erawhin a ring tlat thung. Minute 65-naah Brandon VL Remdika cross chu Djelaluddin Sharityar leh Munmun Timothy Lugun te ven karah Kamo hian a awma la thlain a volley goal.
Goal khatah Kamo hian tha thlah mai loin Syrian midfielder Amna ball fing chu minute 78-naah a tlawh goal leh bawk.
Ivorian striker hian goal hmahruai a khung hian a chunga rinna nghat tlattu Khalid Jamil hnena lawmthu sawi nan a kuah a, injury time-ah Mizo rawlthar Jonthan Lalrawngbawla'n goal hnih khungtu chu thlakin Ivorian forward hi mipuiin kut bengin an lawm.
Kamo faktu Khalid
Aizawl FC coach Khalid Jamil chuan, "Kamo chungchang hi chi thumin ka sawi duh. Pakhatna chu kum 20 leka upa a ni a, mi fel tak a ni a, kawm a nuam a, career thui tak a la nei. Pahnihnaah chuan striker ṭha tak a ni a, hma a sawn belh zel bawk ang. Pathumnaah chuan team tana khel ṭhin player a ni. A thiante tan goal chance a siam sak a, asisst a nei a, a thawkrim em em bawk,"a ti.
Ivorian forward hi hero of the match-a thlan a ni.
Mipui an fak
Mumbai FC coach Santosh Kashyap chuan, "Aizawl FC ka lawmpui a, an khelh ṭhat avangin chak an phu a ni. Ropui ka tih em em chu mipui te kha an ni a, India ram hmun hrang hrangah khatiang ang ṭantu kha awm vek thei se tih hi ka duhthusam a ni," tiin Mizo mipui a fak.
Aizawl FC coach chuan, "Inkhelh ṭan aṭanga a tawp thlengin min ṭawiawm ṭha em em a, ka player 12-na an ni. Min ṭantu zawng zawng chungah khan lawmthu ka sawi a ni," tiin a hnunga ding tlat Mizo mipui a fak ve bawk.
Meghalaya lamah
Shillong Lajong-in East Bengal an mikhual a, tlarhnung chetsual vangin point an hlawh chhuak zo lo.
Lajong keeper Vishal Kaith chetsual vangin Christopher Payne-a'n minute riatna lekah a khung a, Australian forward hian ven uluk a nih loh zarah minute 33-naah goal hnihna a khung leh bawk.
Shillong Lajong-in goal chance an ngah a, Cameroonian forward Aser Dipanda Dicka hmangin minute 64-naah goal khung mah se point hlawh chhuak turin goal dang an khung belh thei lo.
Lajong tan hian Mizo tlangval Isaac Vanmalsawma leh Samuel Lalmuanpuia te an khel tluan a, East Bengal lamah Robert Lalthlamuana'n captain armband hrengin Lalrindika Ralte chu second half-ah luhtir a ni bawk.
Thim thuah hnih!
Tilak Maidan Stadium-ah Mohun Bagan-in Prabir Das hmangin minute 24-naah hma an hruai a, Kolkata club hian midfield an thunun theih loh ang bawkin an goal neih an humhim zo lo.
Churchill Brothers-in Anthony Wolfe (65') hmangin an siphurh an sut a, Chesterpoul Lyngdoh-in minute 71-naah khung belhin Mohun Bagan hmalam a tithim.
Mariners hi thawh chhuah tum mah se minute 80-naah light a chhiat avangin Tilak Maidan Stadium a thim vek a, minute 40 hnuah khelh chhunzawm leh chauh a nih avangin Kolkata club lamin tha thona an nei ṭha tawk lo - tun season-a an chak lohna hmasa ber an tawng.
Churchill khelmuala inkhel hi Goa power minister Milind Naik chuan a hmunah a en a, a awm lai ngeiin light a thim!
Champion inchuh chu
East Bengal-in point 27 an hmu a, Aizawl FC-in point khat chiahin an pha lo. Pathumnaa awm Mohun Bagan-in point rukin an hmelma Red and Gold an pha lo a, amaherawhchu match hniha an khelh tlem avangin table chung bera la awm thei an ni.
Aizawl FC coach Khalid chuan, "Champion chungchang ngaihtuah thei kan la ni ve lo. Keini chuan kan khelh leh tur DSK Shivajians chiah kan thlir ang," tiin champion chungchang zawhna a chhang a, pressure insiam belh a tum lo.
Mizo club hian Thawhlehni zan dar 7:05 khian Pune-ah DSK Shivajians an hmachhawn dawn a, an khingpui tur Dave Rogers-a hote hian nizan khan khualmualah Chennai City an la hmachhawn chauh bawk.
Mohun Bagan striker Jeje Lalpekhlua chuan, "Tunah rih chuan East Bengal dinhmun a ṭha berin ka hria. Aizawl FC leh East Bengal kan hmachhawn leh huna result hian kan hmalam hun a hril dawn a, match hniha khel tlem kan nih avangin la champion thei kan ni," tiin nomawi chawi tur chungchanga a ngaihdan Vanglaini palai a hrilh.
Round 12 - Results
Aizawl FC 2 - 0 Mumbai FC
AFC : Bayi Kamo Stephane 65' 78'
Shillong Lajong 1 - 2 East Bengal
SL : Aser Pierrick Dipanda Dicka 64'
EB : Christopher Payne Baden 9', 33'
Churchill Brothers 2-1 Mohun Bagan
CB : Anthony Anton Wolfe 65'; Chesterpoul Lyngdoh 75'
MB : Prabir Das 24'
Round 13 - Fixtures
March 7, Thawhlehni
4:35 PM Minerva Punjab Vs Shillong Lajong
4:35 PM East Bengal Vs Churchill Brothers
7:05 PM DSK Shivajians Vs Aizawl FC
March 8, Nilaini
4:35 PM Mohun Bagan Vs Mumbai FC
7:05 PM Chennai City Vs Bengaluru FC
Team Dinhmun
# Team Pld W D L GF GA GD Pts
1 East Bengal 12 8 3 1 23 7 16 27
2 Aizawl FC 12 8 2 2 16 9 7 26
3 Mohun Bagan 10 6 3 1 16 6 10 21
4 Shillong Lajong 11 5 1 5 16 15 1 16
5 Bengaluru FC 10 3 4 3 15 11 4 13
6 Churchill Brothers 12 3 3 6 15 18 -3 12
7 Minerva Punjab 11 2 5 4 9 18 -9 11
8 DSK Shivajians 11 2 4 5 9 14 -5 10
9 Mumbai FC 12 2 3 7 6 16 -10 9
10 Chennai City 11 2 2 7 7 18 -11 8
ZoFooty Statistics
Aizawl FC 2 - 0 Mumbai FC
AFC : Bayi Kamo Stephane 65' 78'
MoM : Bayi Kamo Stephane, AFC
52% Ball Possession 48%
18(9) Shots (On Target) 8(1)
305(270) Pass (Completed) 296(211)
10 Fouls 14
4 Offside 1
4 Corner Kick 5
0 Yellow Card 2
0 Red Card 0
Powered by Darchiauva Hardware, Mission Veng