Dubai champion Murray

Andy Murray chuan Fernando Verdasco chu straight set a hnehin a vawi khat nan Dubai Championships nomawi a chawi. Murray tan kumina a nomawi pahatna a ni a, tennis a khelh hun chhunga ATP title 45-na chiah a ni bawk.

Inrinni zan final in­khelah Murray-a'n bul a ṭan fuh lo a, a service game hma­sa pahnih a hloh. Mahse, world number 1 hian tun dinhmuna khaw­vela ṭha ber a nih zia lantirin darkar khat leh minute 13 chhungin 6-3, 6-2 in hnehna a chang.

Britain tlangval Murray hian Verdasco lakah 13-1 record neiin Spain tlangval hi vawi 13 a hneh tawh a, kum 2009 Australian Open fourth round-a a hneh loh bak chu hneh loh a la nei lo. Dubai-a a champion vangin Murray hian $523,330 (Rs 3,49,25,317.21) a dawn bakah Emirates ATP Rankings-ah point 500 a hmuh belh bawk.

Kum 29-a upa Murray chuan, "A vawi khat nan Dubai-ah ka champion ve ta, ka tan kum bul ṭanna ṭha tak a nih chhunzawm ka beisei. Ka match hnuhnung pathumah duhthusama ṭhain bul ka ṭan thei lo a, a hautak thei hle. Chutihrualin rilru puthmang fiahna ṭha tak a ni ve bawk," tiin a sawi.

Grand Slam vawi thum champion tawh Murray hi tun kar chhunga khelh tur Indian Wells Masters-ah a inlan chhunzawm leh ang. Nikum khan Indian Wells leh Miami Masters-ah te Murray hian beisei a phak lo a, third round-ah ve ve a tla.

Murray chuan, "Ni­kum khan Indian Wells leh Miami-ah hian ka khel ṭha lo hle a, result duhawm lo tak lo neih tawhte kha kuminah chuan thaibo ka tum ang," a ti.

Murray hian world ran­king-ah a dinhmun a sawhnghet chho zel a, Novak Djokovic nen an inkarah point 2,000 zet a awm leh tawh avangin French Open hma chuan a dinhmun hi midang tan chhuhsak a harsa tawh hle ang.