Cherries-in United hlau lo

Manchester United-in EFL Cup nomawi an chawi hnua an match hmasa berah Bournemouth nen Old Trafford-ah 1-1 in an inhnehtawk. Inrinni zan inkhel boruak sang takah Cherries midfielder Andrew Surman hnawhchhuah a ni a, referee Kevin Friend-a'n Zlatan Ibrahimovic chungah zahngaihna lantirin Swede forward hian red card a pumpelh a, EFL Cup final-a man of the match Ibra tan zan duhawm a ni lo - chance ṭha vawi tam a hlah bakah penalty a khung lo.

Goal khat ve ve

Minute 23-naah Antonio Valencia-a'n box pawn aṭangin a pet lut a, Marcos Rojo-a'n khawih pialin inkhel thununtu Manchester United-in hma an hruai. Jose Mourinho hoten goal tam zawk an beisei a, amaherawhchu mikhual an beidawng lo.

First half tawp hma minute nga a la awm tihin United defender Phil Jones-a'n Bournemouth midfielder Marc Pugh ṭul lo takin box chhungah a titlu a, referee-in penalty a pe. United youth system chhuak Joshua King-a'n penalty hi goal-ah a chantir a, 1-1 a ni.

Boruak a sang

Old Trafford-ah Bournemouth an kawl hrawng a, point hlawh­chhuah ngei an tum. Cherries player-ten a hunah tackle an hreh lo a, United player-in game ngai reng an khel thei bik lo. First half tawp hma hretin Bournemouth defender Tyrone Mings-a'n tih palh (?) vangin Ibrahimovic-a luah a rap a, Swede forward hian amah raptu a chhinchhiah.

Ibrahimovic hian ball kangah Cherries defender Mings nena zuang dunin chiang takin a nghawk a, hemi hmaa yellow card hmu tawh Swede forward hi hnawhchhuah tura a lan laiin referee Kevin Friend-a ngaihdan a dang. Andrew Surman-a lungawi loin Ibrahimovic hi a nam thlu a, Cherries midfielder erawhin a yellow card pahnihna hmuin hnawhchhuah a ni.

Inkhelh banah Ibrahimovic leh Mings hian khelmual chhunga thil thleng chu an duh reng vanga ti an nih loh thu an sawi ve ve a, insawifiah mah se sawi zui erawh a hlawh ang.

Engtin zel?

United-in player 10-a khel Bournemouth lamah goal khung turin second half tawp hun an nei a, an hun ṭha neih erawh an hmang ṭangkai thei lo. Cherries keeper Artur Boruc-a'n United tana Ibrahimovic-a penatly pet a dan sak a, Polish keeper hi player langsar a ni.

Manchester United manager Jose Mourinho chuan, "First half-ah khan kan khel ṭha takzet a, 3-0 emaw 4-0 tala hma hruai thei tur kan nih laiin hun tawpah 1-1 in a tawp. Tumah dem thei kan ni lo a, kan thiam lo a ni. Second half-ah erawh goal venhim an tum tawp a, tla thei dinhmuna ding an nih avangin ka hriatthiam pui a, an keeper a khel ṭha bawk," tiin an hun ṭha neih an bawhpelh chu an chak loh chhan a nih thu a sawi.