Khawvel leh Haye barakhaihtu Bellew
WBC cruiserweight champion Tony Bellew chuan boxing khawvel barakhaihin heavyweight boxing-ah David Haye a hneh a, London's O2 Arena-a mipui pungkhawm ten an beisei loh zawk result an hmu.
Pawisa inthapna lamah pawh khawvelin Bellew hi a chak ring lo mah se round ruknaah David Haye-a ke na a chhuak a, English heavyweight boxer ropui hian huaisen takin khelh chhunzawm mah se round 11-naah a trainer ten khel chhunzawm zel chiah an ngaih loh avangin towel an thehlut a, kum 34-a upa Bellew a chak.
Kum 36-a upa David Haye-a'n kum 2012 hnua inhnek a hmachhawn leh vawi thumna chauh a ni a, boxing a chawlhsan reng hnuah heavyweight title beisei ngam tura a lo kir lehna zinkawng chu tih khawtlai a ni leh ta rih a ni - Kum 2009-a WBA heavweight champion lo ni tawh boxer hian vawi 31 inhnek a hmachhawnah vawi thum a tlawmna chiah a ni bawk. Liverpool khaw chhuak Bellew-a'n inhnek a hmachhawn 32-ah vawi 29 hnehna a channa chiah a ni a, Haye aia boxer ropui hneh a la nei ngai lo.
Bellew a hlim
European cruiserweight champion hlui Bellew chuan, "Khawvela boxer hnek na ber pawl a ni a, a che rang a, a tlan rang bawk. Ka ngaihdanah chuan Britain-in cruiserweight boxer a neih tawh zinga ropui ber leh heavyweight boxer ropui ber pawl ka hneh a, ka chung en ṭhin a ni," tiin a hlim hle.
Bellew chuan hnehna a chan chhan sawi nghalin, "Haye khan midangin an tihsual ṭhin ang tho tihsual a nei a, chu chu min nau en lutuk kha a ni. Video-ah ka inhnek lai a en a, thiam lo min ti em em a, mah se a takah chuan chu ai chuan ka lo ṭha si a ni," tiin a sawi.
Sports film lar Creed-a lo chang tawh Bellew promoter Eddie Hearn chuan, "Tunah chuan heavyweight title lam kan hawi a hun ta. Bellew ka lawmpui takzet a, tunah chuan a chhungkua leh ama tan nun hlimawm tak a hmang thei dawn ta. Mihringin a mamawh ang chu a nei vek a, a thinlung a huaisenin a beidawng ve ngai lo," a ti.
Chhuanlam zawng lo Haye
Bellew nen an inhnek hma karah hliam vangin David Haye-a'n inenkawl turin Germany a pan a, inhnek laiin a na a chhuak. Mahse, British boxer hian chhuanlamah a hmang duh lo. Haye chuan, "Ka hliam kha chu thil thleng pakhat ve mai a ni a, boxer ṭha zawkin hnehna a chang a ni. Inhnek hmachhawn tur khan ka inpeih a, mah se kei aiin Bellew khan a khel ṭha zawk a ni. Rocky movie ang mai kha niin ka hria a, knockout turin vawi khat hnek chiah ka mamawh a, mah se ka thei si lo," a ti.
Haye chuan, "Bellew aia lian leh chak zawk boxer engemawzat ka knockout tawh a, mah se a ni kha chuan sakeibaknei ang maia thinlung huaisen a ni. Ka theihna zawng zawng ka pe a, mah se a ṭha tawk lo. Zaninah kha chuan boxer ṭha zawk a ni a, ka ngam lo a ni. Fan-ten inhnek leh tura min duh a nih chuan Bellew hi ka hmachhawn leh ang a, mah se engkim ama duhthlanna a ni tawh ang a, an khuaah ngei ka hmachhawn ang. Chu chu a phu a ni," tiin a khingpui a fak hreh lo.