Mapuia Cricket League Champion lai Chanmarians chak hram
Mizorama Cricket inelna ngaihhlut Mapuia Cricket League chu Inrinni khan khelh ṭan a ni a, match hmasa berah champion lai Chanmarians chuan run khatin Chhinga Veng an hneh hram.
Suaka Memroial Cricket Stadium, Sihhmuia inkhelah hian Chanmarians tan opener K. Lalremruata chu run pawh siam loin out nghal mah se Lalhruaizela (29 runs) leh Lalhmangaiha (21 runs) te champion lai mualpho lutuk tur ven nan an rawn ding chhuak a, Chanmarians hian over 20-ah run 98 an tlin.
Chhinga Veng tan target huphurhawm tak niin lang lo mah se beisei an phak bik lo a, run 19 siamtu Saidul leh Gaurav ten thlawptu an nei ṭha tawk lo. Chhinga Veng hian ball tawp berah chak turin run hnih an mamawh a, an vuak chhuah theih loh avangin a tlawm zawkah an ṭang ta a ni.
Inrinnia inkhel hnuhnung zawkah Kulikawn chuan chuan run 20-in Armed Veng an hneh bawk. Kulikawn hian over 20-ah run 97 siamin Vikash Kumar (32 runs) chu player langsar ber a ni. Armed Veng tan run 46 siamtu Amitabo che ṭha viau mah se a ṭhiante zingah thlawptu a nei ṭha tawk lo a, Armed Veng hian run 77 bak an tlin lo.
Vawiinah inkhel a awm lehnghal dawn a, chawhma dar 9:30-ah Zarkawt Lords CC leh Chhinga Veng inhmachhawnin chawhnu dar 12:30-ah Armed Veng leh Chanmarians an inhmachhawn ve leh ang.