Anfield-ah Arsenal an zawr

Arsenal manager Arsene Wenger-a tan champion sawi ngam chi a ni tawh lo - Inrinni zan khan Gunners hian khual­mualah Liverpool an lenchilh a, goal thum ngawt an chhuah avangin 1-3 in an tlawm haw. Tun season-a team pa­hnih an inhmachhawn tawh vawi hnihah Reds an chungnung zawk.

Liverpool tan Roberto Firmino, Sadio Mane leh Georginio Wijnaldum ten goal khat ṭheuh an khung a, Arsenal tana Danny Welbeck goal khung chu an mualpho zualpui khuhna mai a ni - Arsenal boss Wenger-a'n bench-a a dah Alexis Sanchez chungchangah zawhna chhan tur a ngah sawt ang.

Inkhel chu

Anfield-a inkhelah hamrik ham a nih rualin Liverpool-in inkhel an thunun nghal a, Leicester City laka 3-1 a tlawm hlim club an ni tih a hriat loh. Minute 9-na lekah Firmino a inlar nghal a, Brazilian forward tan Sadio Mane hnen aṭanga a ball hmuh chu khung loh atana mawi lo a ni.

Wenger-a'n Sanchez aia tlarhmaa a rin zawk Danny Welbeck leh Olivier Giroud ten Reds penalty area-ah ball an lalut thei lo a, Liverpool bawkin goal an khung chhunzawm. Firmino chuan minute 40-naah a goal khung tur siamsaktu Mane hnenah lawmthu sawi nan ball a pe phei ve thung a, Senegalese forward hian goal a chantir turin harsatna a nei lo.

French manager Wenger-a'n a tihsual hriain second half-ah Sanchez a luhtir a, Chilean forward hian minute 57-naah Welbeck tan siamsak nghalin English striker hian an si phurh a sut ṭhen. Gunners-in beiseina thar nei mah se goal dang an khung chhunzawm thei lo a, Reds erawhin harsatna an nei lo - Georginio Wijnaldum chuan injury time-ah chak nemngheh nan a khung.

Wenger thutlukna mak

Arsenal manager Wenger-a'n hnehna an chan zawh loh chuan top four-ah an awm thei dawn lo tih a hria a, an team lenchilh lah engtiklaimaha club lian huang chhung aṭanga thaibo ni ngai lo Liverpool an ni - mahse, French manager hian a player neih ṭhat ber tia chhal ngam Sanchez chu bench-a

ṭhuttir a thlang.

Wenger-a'n duh a thlang sual tih minute 45 chhungin hmuh turin a awm nghal - tun season Premier League-a goal 17 khunga assist pakua nei tel loin Arsenal tlarhma a bil a, Simon Mignolet tana buaina thlen thei an awm lo! Emirates Stadium-a a dinhmun chiang lo nia sawi Wenger chungchangah zawhna a tam sawt a, season tawpa Gunners hian top four an luah phak lo a nih ngat chuan an elpui Liverpool laka bench-a Sanchez ṭhuttir a nih thu hi sawi chhuah a la ni leh ang.

Klopp-a ropuina

Liverpool-in tun hnaiah Premier League mawngphah team Hull City leh Leicester City an ngam lo a, club lian lakah erawh an ze diktak an chhuah leh ta - Jurgen Klopp an tun season-a Premier League top six club a hmachhawn tawh vawi kuaah tlawm hmel a la hmu miah lo! Vawi nga hnehna changin vawi li a inhnehtawkpui.

German manager hian Liverpool a enkawl hnuah Arsenal, Chelsea, Manchester City, Manchester United leh Tottenham-te league match 16-ah a hmachhawn tawh a, vawi sarih hnehna changin vawi riat a inhnehtawkpui a, vawi khat chiah a tlawm.

Hliam vanga lkar riat zet a chawlh hnuah Philippe Coutinho chuan a match ṭha bera chhal ngam a khel a; Foxes laka talbuai Lucas Leiva aia lut centre back Ragnar Klavan a khel ṭha takzet bawk.

Sadio Mane chu sawi loha leng a ni a, Wijnaldum hmuh hmaih a thiang lo bawk. Newcastle United aṭanga pound maktaduai 25-a Reds zawmtu Coutinho, Adam Lallana leh Firmino awm vangin langsar tawk ṭhin lo mah se club lian an hmachhawnin a theihna a pholang ṭhin - City lakah chakna goal a khung tawh a, Chelsea lakah draw-na goal khungin Arsenal lakah chak nem­nghehna goal a khung leh ta.

Eng nge an sawi?

Klopp chuan, "Arsenal theihna kan hrechiang a, kan game ṭha ber pawl kan khel a ni. Leicester laka kan tlawm hnuah ka naute ka zilh nasa em em a, ṭawngkam mawi tak hman pawh ka tum lo. Vawiinah insiamṭhatna hun pek kan ni a, kan chhawr ṭangkai hi ka lawm a ni," a ti.

German coach chuan sawi chhunzawmin, "Arsenal khan second half-ah theihtawp an rawn chhuah dawn tih ka hria a, Alexis Sanchez hi chu khawvela player ṭha ber pawl a ni a, Simon MIgnolet-a'n min chhanhim a ni. Kar hmasa kan result avang khan kan nguai takzet a, eng thil nge thleng tih hrethiam tur khan hun kan duh rei hle," tiin Foxes an ngam loh hnuah an insiamṭhat thu a sawi.

Arsenal manager Arsene Wenger chuan, "First half-a kan khelh dan kha ka beisei dan a ni lo a, inkhel loa kan chawlh rei deuh tawh avangin kan buai a ni. Second half-a ka naute khelh dan erawh a lawmawm takzet a ni," tiin a naute a sawisel duh lo.