Barca chakna Messi goal ropui
Lionel Messi goal ropui pahnih khung hmangin Barcelona chuan Celta Vigo 5-0 in an sawp a, La Liga hmahruaitu an nih chhunzawm. Inkhel dangah Cristiano Ronaldo leh Gareth Bale te tel loa inlan Real Madrid chuan Eibar 4-1 in an hneh ve bawk.
Barcelona coach Luis Enrique-a'n a contract a pawh sei loh tur thu a sawi hnua an match hmasa berah Catalan club tana a changtupa chu Messi a ni. Argentina captain hian goal hnih a khung bakah Neymar leh Samuel Umtiti te goal khung tur a siamsak a, Ivan Rakitic goal khung pawh Messi thawhrah tho a ni.
Messi goal
Nou Camp-a inkhelah Lionel Messi chuan player ṭha chungchuang bik a nihzia a lantir. Luis Suarez leh Messi ten goal ban an pet per hnuah Messi tak tak a inlar. Midfielder Sergio Busquets hnen aṭanga a ball hmuh chu a awma lain a vir pui a, chak taka a tlan pui zuiin Celta defender a bum hnuah goal hmahruai a khung.
Kum 29-a upa Messi hian Neymar tan through ball pein Brazil captain-in an goal hnihna a khung a, second half ṭan tirhah Messi ke aṭanga ball chhuak kal zel chu Rakitic-a'n a khung bawk.
Barca star Messi-a'n a la duhtawk lo. Minute 46-naah mual dinglam sirah chak takin ball a tlanpui a, defender pahnih - Gustavo Cabral leh Sergi Gomez te a paltlang hnuah tawih zetin an goal lina a khung. Messi goal khung hian kum 1986 FIFA World Cup-a Argentina legend Diego Maradona-a'n England lama a goal ropui khung kha mi tam tak a hriat chhuahtir ngei ang.
Ballon d'Or chawimawina vawi nga dawng tawh Messi hian tun season-ah a club tan inelna hrang hrangah match 37 a khelh aṭangin goal 38 a khung tling tawh a, Nilaini zana Champions League-a an mikhual tur Paris St-Germain tan Nou Camp pan a châkawm loh khawp ang le.
Barca hian an khelmuala an match hnuhnung pahnihah goal 11 khungin a lamah vawi khat chiah a lut a, French champion tan goal 4 an neih sa chu thlamuanpui ngawt a fuh dawn lo.
Real an buai lo
Real Madrid tan hliam tenau vangin Ronaldo a inan thei lo a, khawvela player manto pahnihna Bale chu hrem vangin an chhawr thei lo bawk. An player langsar pahnih khel thei lo mah se Zinedine Zidane-a naute hian Karim Benzema an neih avangin buaina tur a awm lo.
An league match hnuhnung pasariha goal khung lo France international striker Benzema hian goal khung a la thiam tih lantir nan Eibar lakah goal hnih a khung a, James Rodriguez-a'n freekick a chhuih luh bakah Marco Asensio chuan an goal lina a khung ve bawk.
Real boss Zidane chuan, "Karim kha kan goal paliah a inrawlh kim vek a, player ṭha bik chu sawiselna leh boruak sang tak karah pawh an par chhuak leh ṭhin. Ka naute khelh danah ka lawm em em a, kan goal khung kha chu thuhhran ni se ball kan chang hnem a, inkhel kan thunun bawk," tiin a sawi.
Real Madrid hian La Liga match 46 chhung zet chu a zawnin goal an khung tawh a, Spanish club zingah a zawna goal khung rei thei ber an ni. Tun season league match 25 an khelh tawh aṭangin point 59 hmuin league table-ah pahnihna an ni a, anmahni aia match khata khel hnem zawk Barcelona chu point khatin an phak lo.