Ligue 1 boruak a sang

French Ligue 1 club 20 inel zingah champion thei pathum - Paris St Germain, AS Monaco leh Nice te an awm a, club pathumte point hmuh zat hi 62 vek a ni. Monaco hian match khatin an la khel tlem rih.

Inrinni zanah cham­pion lai PSG chuan minute 80-naa Edinson Cavani penalty chhuih luh hmangin an mi­khual Nancy 1-0 in an hneh hram. Uruguay international striker hi tun season-ah a club tan inelna hrang hrangah goal 37 a khung tling der tawh. Inkhel dangah Nice chuan Wylan Cyprien goal hmangin Dijon 1-0 thoin an hneh ve bawk.

PSG hian Nilaini zanah Champions League last 16 khel turin Nou Camp an pan dawn a, French champion hian Barcelona lakah 4-0 in hma an hruai tawh a, an khingpui tur hi Lionel Messi telna an nih miau avangin quarterfinal erawh an la lut chiang lo.

Paris Saint-Germain coach Unai Emery chuan, "A hma aiin Barca hi an hlauhawm tawh zawk. Season tawpah an manager a chhuah dawn avangin an buai phah lo a, a hma zawng aiin an khelh ṭhat phah zawk," a ti. PSG hmachhawn tur Barcelona hian kartawp La Liga-ah Celta Vigo 5-0 in an sawp.