Champions League khelh tum Napoli

Dries Mertens goal hnih hmangin Napoli chuan AS Roma 2-1 in an luhchhuah a, season thara Champions League khelh tuma an beiseina an chhawm nung zel.

Inrinni zan Serie A inkhelah Mertens hian Marek Hamsik-a through ball ṭha zet chu minute 26-naah goal-ah a chantir a, second half ṭan aṭanga minute nga hnu lekah Lorenzo Insigne hnen aṭanga a ball hmuh chu a khung leh bawk. Belgian forward Mertens hian Serie A bika a goal 18 a khung tling ta. Hun tawp dawna Kevin Strootman goal khung chu Roma mualpho lutuk tur hliah khuhna chauh a ni.

Roma midfielder Daniele de Rossi chu Napoli keeper Pepe Reina a pet avangin hnawh chhuah a ni a, he thil thleng a duh loh zia uchuak taka lantirtu Napoli coach Maurizio Sarri pawh hnawhchhuah a ni ve bawk.

Napoli hian Serie A match 27 khelh aṭanga point 57 hmuin league table-ah pathumna an ni a, pahnihna Roma nen an inkarah point hnih chiah a awm.

Napoli chak hi Roma tan lung­ngaihna nih rualin Juventus tan erawh an nomawi humhim tura kawng sialtu pawimawh a ni - Juve hian nizan khan Udinese an hma­chhawn a, an chak a nih chuan point 10 zetin hma an hruai fal tawh ang.

Inkhel dangah AC Milan chuan an mikhual Chievo 3-1 in an lo hneh ve bawk. Season thara Europe-a inlan tum Milan tan hian Carlos Bacca chuan goal hnih a khung bakah Gianluca Lapadula-a'n goal khat a khung ve bawk - Milan hian point 50 hmuin table-ah parukna an ni mek.

Milan coach Vincenzo Montella chuan, "League table-a club dang dinhmun ngaihtuah buai hman kan ni loa, season thara Europe-a inlan phak hi kan tum hmasa chu a ni. Tunah chuan harsa takin hnehna kan chang phawt a, kar leha Juventus kan lenchilh tur kan thlir zui ang," tiin a sawi.