Zanin aṭangin Mizoram Super League Chanmari Vikings vs MSV Hotshots

Tualchhung basketball inelna lian leh sang ber - Mizoram Super League season 7 chu zanin dar 8:00 aṭangin khelh ṭan a ni dawn. Match hmasa berah Chanmari Vikings leh Mission Veng Hotshots te an inhmachhawn ang.

R. Dengṭhuama Indoor Stadium, Mualpuiah khelh tur a ni dawn a, a hmuna en duh tan tikcet man Rs 50 leh Rs 100 a ni. Zonet chuan live-in a pe chhuak dawn; TV hmanga en duh tan Zonet Rihnim hmangin a en theih ang a, online hmanga en duh tan Zonet Empai aṭangin a en theih ang. Mahni awmhmun aṭangin a en theih tihna a ni.

MSL 7-ah hian team ṭha paruk - Zarkawt BCA, Khatla TBL, Chanmari Vikings, Tuikual South, Chawnpui leh MSV Hotshots te an inel dawn, an inkhelh kual vek hnuah a sang paliin 'playin' an khel ang, a hniam ber erawh an tla nghal dawn.

Team thar Hotshots
MSL season ruk khelh a ni tawh a, ṭhenkhat chuan tawnhriat an nei hnem tawh. Mission Veng Hotshots erawh tun season aṭangin an inlan dawn. An tan MSL hmasa ber ni mah se an hlauthawng lo, assistant coach David Lalruatfela chuan an zam lo tih Vanglaini a hrilh.

Dave-a chuan, "Kan tan chuan MSL hi a vawi khatna a ni dawn, player zingah pawh Eddie Zaithanmawia tih loh chu a thar deuh vek an ni hlawm. Team leh player thar nena inlan tur ni mah ila kan zam lo, chak tumin inelna kan hmachhawn nghal ang.

"Court indaih lohna avangin duhthusam taka inbuatsaih erawh a har. Amaherawhchu kan training chhunah theihtawp kan chhuah a, player-te fitness a ṭhat bawk avangin beisei pawh kan nei sang," tiin a sawi.

Player a nih laia Zarkawt BCA captain hlui David tan pawh coach a nih hnua MSL hmasa ber a ni dawn, a player zingah Khatla TBL tana khel tawh Eddie-a chu experience nei ṭha a ni a; K. Lalfakzuala leh Lalhruaizela te pawhin tawnhriat an nei.

Nimin khan Punjab aṭanga an chah luh Arshdeep Singh a lo thleng a, 6ft 5in a sang forward hi zaninah a inlan nghal a rinawm. USA aṭanga lo kal tur Josua Aaron Keyes erawh a lo la thleng lo, match hmasa berah chuan a inlan thei dawn rih lo.

Vikings Inringtawk
Chanmari Vikings hian champion tum ngam tuirn squad an nei chhah ṭha tawk viau. Tawnhriat nei ṭha - Moses Zoremmawia leh Vanchuangpuia (ChP-a) an nei thar a, an neihsa Michael F. Lalawmpuia leh Lalruatkima Sailo te nen an thawkho dawn.

Vikings coach H. Lalhruaitlunga chuan, "Zaninah chuan Mizo hlangin kan khelh a la ngai dawn, tualchhung player hlang ni mah ila theihtawp kan chhuah ang, kan khingpui tur hi team ṭha leh phur tak ni mah se hneh kan tum," tiin Vanglaini a hrilh.

Season hmasa khan Vikings hian Raymond Edward Miller Jr an chah lut a, khel ṭha viau mah se hripui vangin inelna an hmang zo lo. Ani bakah hian Haryana guard Harsh Rao an ziak lut bawk, mahse anni pahnih hi zaninah an la inlan thei dawn lo thung.

Hruaia chuan sawi zawmin, "Team tin kan intiat tawk tlang hlawm a, training kan neih dan pawh a rualkhai viau chuan ka hria. Mizo player kan chhawr turah hliam leh hrem tuar an awm lo, inrintawkna nei mah ila kan la khelh ho tam loh avangin sawi lawk vek a harsa," a ti.

Vikings hian Mission Veng Vikings an nih laiin MSL nomawi an chawi tawh. Chanmari Vikings an nih hnuah erawh an la hlawhtling rih lo, kuminah hian beiseina sang tak nen inelna an hmachhawn dawn a, match hmasa bera chet fuh nghal an tum ang.

MSL 7 Fixtures
June 1, Nilani
Chanmari Vikings 08:00 PM MSV Hotshots
June 2, Ningani
Tuikual South 08:00 PM Chawnpui
June 3, Zirtawpni
Khatla TBL 08:00 PM Zarkawt BCA
June 4, Inrinni
MSV Hotshots 08:00 PM Tuikual South