MPFA chawimawina dawngtu Puitea & Nunga

Nimin khan Mizo Professional Footballers Association chuan Thara Resort-ah general body meeting an nei a, season hmang ṭha player hnenah chawimawina hlanna hun an buatsaih nghal.

ISL neih zawh taka Kerala Blasters final thlenpuitu K. Lalṭhathanga (Puitea) chu MPFA player of the year atan thlan a ni a, I League club Sreenidi Deccan defender Lalchungnunga chu MPFA young player of the year-ah thlan a ni bawk.

Bethlehem Vengthlang tlangval Puitea hian tun season ISL-ah khan match 20 khelin assist vawi thum a nei a, hero of the match-ah ṭum hnih thlan a ni. Mizo tlangval hian Kerala Blasters-ah hmun pawimawh a chang a, midfield khaikhawmtu tiin a sawi theih.

Durtlang tlangval Lalchung-nunga hian tun season khan Aizawl FC aṭangin Sreenidi Deccan a zawm a, hmun pawimawh a chang nghal. Nunga hian assist vawi li a nei a, amah aia assist nei ngah chu Mohammedan Sporting Club midfielder Nikola Stojanovic chiah a awm.

Player of the year leh young player of the year atan hian MPFA executive committee-in player pathum ve ve an chhawp chhuak a, heta ṭang hian member-ten an duh an thlang leh a ni.

Mizoram sports minister Robert Romawia Royte chuan MPFA general body meeting hi a telpui a, jersey tlangzarhna a nei nghal bawk. MPFA hian ṭum danga an tih ṭhin angin chawlh hmanga Mizorama an awm lai hian Charity Match buatsaih an tum.

MPFA hi February 14, 2010 khan din a ni a, football hmasawn nan charity match leh exhibition match-te an khel ṭhin a, mi harsa zawkte an ṭanpui bakah naupang zawkte tan kawng an hawnsak bawk.