Medvedev hnehtu Marin Cilic

French Open champion tura rinkai zinga mi - Daniil Medvedev leh Stefanos Tsitsipas te chu quarterfinal lut phak loin an zinkawng a tawp. Anni pahnih an tlak takah chuan an kawnga awm Marin Cilic leh Holger Rune te tan final kawng a inhawng zau ta hle.

Roland Garros, Paris-ah Medvedev-a'n beisei ai takin a khel ṭha, a tawpah erawh a ṭang tlang zo ta ngang lo. Russian star hi Croatian tlangval Cilic lakah 6-2, 6-3, 6-2 in a chak lo, darkar khat leh minute 45 chhung lekin a tlawm fel hman.

Inkhel dangah seeded palina Tsitsipas pawh a chak lo, rawlthar Holger Rune chuan a vawi khat nana Grand Slam quarterfinal lut turin Tsitsipas hi 7-5, 3-6, 6-3, 6-4 in a hneh a, zinkawng ngaihnawm a chhunzawm.

A hun a thleng
Cilic hi kum 33 mi a ni tawh a, inelna lian US Open nomawi meuh chawi tawh mah se French Open-ah a khel ṭha ngai lo. Tunah erawh a vawi khat nan French Open-ah ranking sang zual 10 zinga mi a hneh ve ta, chanchin lawmawm bik a ni ang.

Croatian tlangval hian a service hmasa aṭangin 90% ngawt point a hmu thei, a khingpui hi break point pawh a hmuh tir miah lo. A service a hum vek lai hian Medvedev erawh vawi nga a chhuhsak thung, an dinhmun a inthlau viau.

Seeded 20-na Cilic chuan, "Tennis ka khelh tawh china ka match khelh fuh berte zinga mi a ni ang. Player ṭha bik Daniil te ang kan hmachhawn a nih chuan tihsual neih tam a thiang lo," tiin a khelh danah a lungawi hle.

Quarterfinal-ah chuan Cilic hian Andrey Rublev a hmachhawn leh ang. Seeded pasarihna Rublev hian last 16 inkhel dangah Jannik Sinner chu 1-6, 6-4, 2-0 in a hneh, a khingpui hi hliam vangin match a khel zo thei lo a ni.

Tsitsipas a tla
Grand Slam boruak hi chu a danglam deuh ṭhin a ni, rin hlawh ṭhenkhat an kal fawr laiin ṭhenkhat erawh mak angreng taka an tlak a ngaih chang a awm ṭhin. Tsitsipas tan pawh major title hmasa ber la tur chuan Wimbledon a nghah leh phawt a ngai dawn.

Roland Garros 2022 an khelh hma khan Holger Rune hian mi hriat a hlawh lo. Tun hmain Grand Slam vawi hnih a khel tawh a, chak ni hmel a la hmu lo - tunah erawh Tsitsipas hnehin quarterfinal a lut a, a kalkawngah hian set khat chiah a la hloh.

Kum 19 mi Rune chuan, "Ka zam chhe hman hle, mahse hlau leh khur chunga ka khelh chuan ka chak dawn lo tih ka hria. Chuvangin ka inngaihtuah harh vat a, pressure nei miah loin nuamti takin ka khel tawp mai a ni," tiin a sawi.

Denmark rawlthar Rune hian Casper Ruud a hmachhawn leh dawn. Seeded pariatna Ruud-a hian Hubert Hurkacz chu 6-2, 6-3, 3-6, 6-3 in a lo hneh ve thung a, an kalkawng lam aṭangin rinkai fal an awm tawh lo - a vannei berin final an lut ang.