June 24 aṭangin Inter Village Football

Nimin khan All Mizoram Inter Village Football Tournament organising board an ṭhukhawm a, inelna ṭan hun a chiang ta. June 24, Zirtawpniah inelna ṭan a ni dawn.

Inelna hi sponsor-tu LBS SUZUKI hming chawiin LBS SUZUKI All Mizoram Inter Village Football Tournament tih a ni dawn. Entry fee hi Rs 1,000 a ni a, GPay hmangin VL Rinpuia (9862647664) hnenah June 14, Thawhlehni tlai dar 3:00 thleng pek theih a ni ang.

Team pakhatah hian player 25 a inziah luh theih dawn a, official mi panga a ziah tel theih bawk ang. Match day bikah erawh player 20 a ni dawn a, player panga an awl dawn tihna a ni.

Team Entry form leh Tournament Regulation hi MFA Facebook page aṭangin a download theih dawn. Hun rei tak veng/khua inelna a awm tawh loh avangin All Mizoram Inter Village Football Tournament hian ngaihven a hlawh a, zing leh tlaiah football khelmualte a lun leh ta hle.