Finalissima ; Europe nge South America thiam zawk?

Football ngainatute nghahhlelh, European champion leh South American champion inelna 'Finalissima' chu khelh a ni dawn ta - zanin dar 12:15 hian Italy leh Argentina an intawng dawn.

European football-a thuneitu sang ber UEFA leh South American football thuneitu CONMEBOL hian tun hmain an khawmualpui champion hi vawi hnih an lo intawn tir tawh a, zanin Wembley Stadium-a an inkhel tur hi a vawi thumna tur a ni.

Kum 1985 khan France chuan 2-0 in Uruguay an lo hneh tawh a, kum riat hnuah Argentina chuan 1-1 a an inhnehtawk hnuin Denmark chu penalty-ah 5-4 in an hneh bawk.

Zaninah khawmualpui champion team pahnih an intawng leh dawn - a chak lo zawk tan mawhphurhna a sang dawn tih a lang chiang a, khawmualpui dem rawn nih lohna turin team pahnihin chak zawk nih an tum ve ve ang.

Azzurri tan beiseina
European champion ni chungin Italy-in World Cup an khel phak dawn lo a, hmanni lawka fak rawn coach Roberto Mancini leh player te tan chuan mualphona tawp khawk a ni a, Finalissima-ah an chak chuan an rilru na engemawchen thawi dam theih a ni ang.

Hei chauh a ni lo - captain Giorgio Chiellini chuan Finalissima zawhah ram tana inkhelh chawlhsan a tum a, season thara Major League Soccer lama a puan thuah nena input luh tum defender hian nomawi nen an ram team mangṭha a duh dawn.

Azzurri tan beiseina siamtu pakhat a awm. Zanina an inkhelhna tur Wembley Stadium hi England hneha Euro nomawi an chawina kha a ni a, European champion an nihna khelmualah inringtawk takin Argentina an hmachhawn thei ang.

Italy tan hliam vangin Federico Chiesa leh Ciro Immobile inlan thei dawn lo mah se Sassuolo forward Gianluca Scamacca, Napoli forward Lorenzo Insigne leh AS Roma winger Nicolò Zaniolo/ Juventus forward Federico Bernardeschi te an awm a, Argentina tlarhnung tana buaina thlen turin an ṭha tawk.

Messi telna
Argentina squad-ah Lionel Messi a awm a, kum 34 mi forward hian a club thar Paris Saint-Germain tan season duhawm tia sawi tur hmang lo mah se Argentina jersey a hak chuan a danglam ṭhin a, Leonardo Bonucci leh Chiellini ten ven an châk lo ang.

South American champion hian vanneihna tak an nei - tlarhmaa Messi kawppui tur Lautaro Martínez hi Italy hrechiangtu a ni a, kum 24 mi forward hian season hman zawh takah khan Inter Milan tan goal 25 a khung.

Messi leh Martinez te nena ding ho turin Ángel Di María a la awm bawk a, Argentina hian an tisual viau a nih loh chuan goal khung tur player an nei ṭha tawk.

Barcelona legend Messi hian ram tan match 160-ah goal 81 a khung tawh a, kum 24 mi Martínez hian ram tan match 37-ah goal 19 khung tawhin, Di María hian match 121-ah goal 24 a khung tawh bawk.

Team thlirna
Argentina chak lohna nia an sawi ṭhin tlarhnungah pawh South American team hian hma an sawn - keeper atan Aston Villa si ban nghaktu Emiliano Martínez an nei a, Sevilla left back Marcos Acuña, Benfica centre back Nicolás Otamendi, Tottenham Hotspur defender Cristian Romero leh Real Betis right back Juan Foyth te an nei.

Midfield-ah Atletico Madrid midfielder Rodrigo De Paul, Real Betis defensive midfielder Guido Rodríguez leh Spurs aṭanga Villarreal-a loan-a khel Giovani Lo Celso te an nei bawk.

Italy keeper Gianluigi Donnarumma-a'n a club thar PSG-ah a beisei angin ropuina chang lo mah se a ṭhatzia sawi nep theih a la ni lo a, a hmaa Bonucci leh Chiellini thlawp tura Napoli right back Giovanni Di Lorenzo leh Lyon left back Emerson Palmieri an la awm bawk avangin tlarhnungah pawh an ṭha tawk.

Midfield-ah Chelsea thiampuipa Jorginho chu bul ṭan leh ngei tura ngaih a ni a, Inter Milan midfielder Nicolò Barella leh PSG player thiam bik Marco Verratti te nen an ding ho leh tura ngaih a ni - inkhel a hmuhnawm dawn.

World Cup inpetkai tur kan ni a, mahse, thil ṭhenkhat kan duh angin a thleng thei ta lo a ni. Team naupang tak kan nei a, fans hoin min thlawp reng bawk. Kum khat liam ta maiah khan Euro 2020 nomawi kan chawi a, kan phu bawk - UEFA Nations League-ah lah group harsa berah kan awm a, Argentina hmachhawn tur player pawh ka la thlang fel lo. Di Lorenzo-a'n bul a ṭan mai thei a, Leonardo Spinazzola pawh a ni mai thei.
- Roberto Mancini, Italy coach

Team ṭha tak hmachhawn hi chu engtiklai pawhin a ṭha a ni. Argentinian player, kan ram tana khelte hian anmahni tan mai ni lo, he ram leh an chhungkaw tan an khel a, chutiang chu thil nihphung pawh a ni reng ṭhin - tunah phei chuan a ni lehzual a ni. - Lionel Scaloni, Argentina coach

Inkhel Chhehvel
• Minute 90 an inkhel ang a, hemi chhunga chak zawk an awm loh chuan extra time khel loin, penalty hmanga chinfel nghal tur a ni.
• February 12, 2020 khan UEFA Executive Committee leh CONMEBOL Council ten thawhhona thuthlung an ziak a, he thawhhona kal zel hian Finalissima hi a hring chhuak.
• Pawl pahnih hian zirna, training, technical development, refereeing promotion, grassroots, youth leh hmeichhe football hmasawn nana thawhhoah inremna an nei.
• Inremnaah hian mipa, hmeichhe leh youth football/futsal competition siam leh inchhim tawn thlengin dah a ni.
• Marketing, legal, social responsibility, safety & security, football-a inkaihhruaina ṭha a awm theih nana thawhho thlengin a tel.

Finalissima - June 01, Nilaini Zan
Italy 12:15 AM Argentina
*Television aṭang chuan Sony Ten 1-ah a en theih ang a, online-a en duh tan SonyLIV leh JioTV-ah a en theih dawn bawk.

Team thlirna
Italy
FIFA ranking 6
World Cup best Champion (1934, 1938, 1982, 2006)
UEFA EURO best Champion (1968, 2020)

FIFA ranking 4
World Cup best Champion (1978, 1986)
Copa América best Champion (Vawi 15)

Bul ṭan tura beisei
Italy (4-3-3): Donnarumma; Di Lorenzo, Bonucci, Chiellini, Emerson; Barella, Jorginho, Verratti; Bernardeschi, Scamacca, Insigne

Argentina (4-3-3): E. Martínez; Foyth, Romero, Otamendi, Acuña; De Paul, Rodríguez, Lo Celso; Messi, L. Martínez, Di Marí