Boehly leh a thawhpuiten Chelsea an lei fel ta

Premier League club Chelsea chuan neitu thar a nei ta - American sumdawng hausa Todd Boehly leh a thawhpuite chuan London club hi pound tluklehdingawn 4.25-in an lei fel ta a, season thar aṭang chuan neitu thar hnuaiah Blues an khel tawh dawn.

Russia-in Ukraine a run avangin United Kingdom sorkar chuan a theihna chin chinah Russia a hrek a, Russia president Vladimir Putin nen inremna nei nia a hriat Russian sumdawng hausa ho a hrek tel.

Chelsea siam liantu Roman Abramovich pawh hian hrek a ni ngei dawn tih a inhria a, UK sorkarin an ram chhunga a thil neihte khawih che thei loa an siam hmain March thla khan Chelsea hi a zuar.

UK sorkarin Abramovich hrek zui mah se an sum che velah tuk sak chin neiin, special government licence chu May 31 thleng atan a pe - niminah khan he licence hi a tawp a, licence tawp hmain an inhralh fel thei hram.

Fan-te tan
March 2 khan Chelsea hi lei theih a ni tih puanzar a ni a, mi pawl/mimal sumdawng hausa 250 zetin London club hi lei duhin an ngaihven - a tawpah lei duh tak tak 11-ah thlitfim a ni a, an ruahmanna leh an club lei duh chhante thlir a nih hnuah Boehly leh a thawhpuite an vannei ta ber.

Boehly chuan, "Chelsea club neitu thar kan ni hi kan lawm takzet a, minute tinin he club tan hian 100% kan chhuah dawn a ni. Club neitu kan nihna anga kan thil tumah kan chiang a, fan-te lawmna thlen kan tum," a ti.

Chelsea neitu thar Boehly leh a thawhpuite hian transfer bazar-ah sum ren an tum dawn lo niin an lam hnai tak pakhat chuan a lo sawi tawh a, eng ang takin nge an bazar ang tih chu thil hriat châkawm a ni.

Boehly chuan, "Kan youth squad tichhah a, talent ṭha ber ber lakluh hi kan tum rualin, Chelsea tan hian hmachhawp thui tak kan nei a, Blues hlawhtlinna leh sulhnu ropui tak hi chhunzawm kan tum a ni," a ti.

Kan lawm e
May 7 khan Boehly leh a thawhpuite chuan Chelsea lei turin Chelsea hralh buaipuitu Raine Group chu £4.25tld-in inremna an lo neihpui daih tawh a, mahse, Premier League leh UK sorkarin an pawmpui ve leh phawt a ngai.

UK sorkar chuan an rama a thil neih pawh khawih che thei loa an hrek Abramovich chu Chelsea hralh avang a a hlawk an duh lo a, Russian sumdawng hausa hian London club a hralhna aṭanga hlawkna awmte chu Russia leh Ukraine indo tuartute tan a hlan tur thu sawi mah se an ring zo lo.

Abramovich hian Chelsea hnena £1.5tld a puktir pawh a tira a sawi ang lo takin inrulhtir a tum nia sawi thawm a awm a, hei vang hian Blues hi hralh loh thut theih dinhmunah a ding reng. Mahse, May 24 khan Premier League-in Chelsea hralh a pawmsak a, May 25-ah UK sorkar chuan a pawmsak zui ve bawk.

Boehly chuan, "Chelsea kan lei theih nana an hnathawh avangin British sorkara minister leh official, Premier Leaague thuneitute zawng zawng chungah lawmthu kan sawi a ni," a ti.

Hmabak a hautak
Chelsea neitu tharten transfer bazar-ah sum sen an hreh lo a, an thusawi aṭanga teh chuan an hmachhawp pawh a ropui - mahse, London club hi khelmual chhunga chinfel tur tam takin a lo hmuak nghal.

Manchester City leh Liverpool el phak tur chuan squad chhah a ngai dawn a, mahse, squad tihchhah hma hauhin chhuak turte hmun ruak luah tur zawn phawt a ngai dawn - a chhuak turte thlirin hei ringawt pawh hna hautak a tling ang.

Chelsea centre back Antonio Rudiger chuan contract thar ziah a tum lo a, free transfer-in Real Madrid zawm a tum a, Andreas Christensen leh Marcos Alonso ten Barcelona pan an tum a, captain Cesar Azpilicueta pawh Catalan club nen an sawizawm.

Midfielder pawimawh pahnih N'Golo Kante leh Jorginho te chu nakkum nipuiah an contract a zo tawh dawn a, chelh an duh chuan contract thar zawrh a hun tawh - a nih loh chuan a thlawna chân thei an ni. Hetihlai hian midfielder Mason Mount leh defender Reece James pawh hlawh tam zawk hlawh turin contract thar pek an tum nia sawi a ni.

Tute nge neitu?
Chelsea leitu zingah hian Boehly chu an hotupa ber a ni a, ani hian vawi sarih baseball World Series champion ni tawh LA Dodgers, hmeichhe basketball team Los Angeles Sparks leh NBA franchise Los Angeles Lakers-ah te share a nei bawk.

Kum 48 mi Boehly hian sports betting firm leh restaurant chain-ah te share a nei bawk. Hetihrual hian share ngah ber erawh California-a private equity firm Clearlake Capital an ni.

US mi hausa Mark Walter leh Swiss sumdawng hausa tawntaw Hansjorg Wyss-te pawh share lian tham nei tur zingah an tel a, kum 62 mi Walter hi global financial services firm Guggenheim Partners dintu leh chief executive officer a ni a, kum 86 mi Wyss hian biotech company Novocure leh Molecular Partners-ah share a nei a, £4tld mimal hausakna a nei.

Anni bakah hian American PR executive Barbara Charone, British sumdawng Jonathan Goldstein leh British journalist Daniel Finkelstein te pawhin Chelsea-ah hian share an nei ve dawn a ni.

Mangṭha Roman
Kum 2003 khan Abramovich-a'n pound maktaduai 140-in Chelsea a lei a, hetihlaia club vantlang tak hi English club ṭha pawlah chhuahin nomawi chawi theih ang chu a hnuaiah an chawi kim.

Russian sumdawng hausa hnuaiah London club hian Champions League (2), Premier League (5), FA Cup (5), Europa League (2) leh EFL Cup (3) nomawi an chawi a, August 2021 khan UEFA Super Cup-ah champion in, February-ah a vawi khat nan FIFA Club World Cup-ah an champion bawk.

Abramovich-a'n Chelsea neitu a nih chhungin manager 13 a thlak hman a, transfer bazar-ah £2tld chuang a hmang bawk. Chelsea hmeichhe team thlengin hma an sawn a, Women's Super League-ah vawi nga an champion a, FA Cup-ah vawi li an champion.

Kum 55 mi Abramovich chuan, "Chelsea neitu nihna midang kuta ka hlan rualin, khelmual chhung leh pawna hlawhtlinna an chan zel theih nan duhsakna ka hlan a ni. He club chhungkuaa ka tel ve kha damchhung tana intihtheihpui tham a ni a, club player leh staff ni mek leh lo ni tawh zawng zawng leh fan-te chungah, kan hun tawn hlimawm tak avang khan lawmthu ka sawi a ni," tiin a club hlui a thlah.