Nations League khelh ṭan a ni leh dawn ta

UEFA hnuaia ramte tana football hmanga inelna Nations League chu zanin aṭangin khelh ṭan a ni leh dawn. Tun ṭum hi season thumna a ni a, inelna hmang hian FIFA World Cup leh Euro C'ship a khelh theih avangin ngaihhlut a hlawh chho zel.

Inelnaah hian Europe-a ram 55 chu an ṭhat dan a zirin league paliah ṭhendarh an ni a, league sang ber League A leh a hnuai pahnih League B leh C-ah team 16 ṭheuh an awm. League hniam ber League D-ah team pasarih chauh an awm a ni.

Russia an hrem
Russia leh Ukraine chu ram inhal an nih avangin group khatah an awm kawp thei lo a, hei bakah hian Russia hi Ukraine an run avangin an hrem. Russia hi league sang ber dawttu League B-ah an awm a, tun ṭumah hian Iceland, Israel leh Albania te nen group B2-ah an awm.

Russia hi an hrem vangin an khel ve dawn lo a, May 2 khan UEFA chuan thuchhuah siamin season tharah League C-ah an relegate tur thu an an puang. Iceland, Israel leh Albania te erawh pressure awm loin an inkhel kual thei dawn a, Russia an relegate tak avangin League A tling tur chauh an zawng dawn tihna a ni thei ang.

Inelna kalphung
Nations League-ah hian champion an awm ṭhin a, League A aṭang chauhin champion an awm thei. League A group palia ti ṭha berte chuan nakkum June 14-18 hian playoff hmangin champion an zawng ang.

Chutihrualin League A group tina hnuai bera awmte erawh League B-ah an tla dawn a, chutiang chiah chuan League B chung bera awm pawh League A-ah an kai chho dawn. League A aṭanga League D hi a inzawm vek tihna a ni.

League phase bik hi June 1 leh September 27 chhung hian khelh a ni dawn a, inelna hmachhawn tur chuan nipui chawlh pawh an nei dawn lo tihna a ni thei ang.

An ngaihlu lo!
Nations League-in hma sawn hret hret mah se inelna ngaisang lotu pawh an ṭhahnem tho a, chung zingah chuan Manchester City player pawimawh Kevin de Bruyne pawh a tel.

Belgian midfielder De Bruyne chuan, "Ka tan chuan Nations League hi a pawimawh lo. Kan khelh ngei erawh a ṭul a, a nihna takah erawh practice match ang chauh a ni.

"Player tinin season hautak an hmachhawn zo chauh. Khelmuala kan awm tawh chuan kan tih tur kan ti ṭhin a, chak ngei kan duh ṭhin. A bakah chuan han sawi zui vak tur ka nei lo. Keini chuan chawlh hahdam a, intih thawven vete pawh kan duh. Kum khatah hian kar thum vel chauh chawlh kan nei a, player lo chuan kan hun tawn hi an hrethiam lo," tiin a sawi.

De Bruyne hian season hman zawh takah khan Manchester City tan match 49 a khel a, goal 20 a khung.

League A
Group A1 : France, Denmark, Croatia & Austria
Group A2 : Spain, Portugal, Switzerland & Czech Republic
Group A3 : Italy, Germany, England & Hungary
Group A4 : Belgium, Netherlands, Poland & Wales

Zanin Inkhel Tur
Poland 9:30 PM Wales
June 2, Ningani
Czech Republic 12:15 AM Switzerland
Spain 12:15 AM Portugal
June 3, Zirtawpni
Croatia 12:15 AM Austria
France 12:15 AM Denmark
Belgium 12:15 AM Netherlands
Hungary 9:30 PM England
June 4, Inrinni zan
Italy 12:15 AM Germany