FIFA World Cup Playoff Zanin dar 12:15-ah Scotland Vs Ukraine
Russia-in Ukraine a run avangin FIFA World Cup playoff khelh hun sawn a ṭul phah a, zanin hian khelh hmabak khelh a ni dawn. Zanin dar 12:15 hian Hampden Park-ah Scotland leh Ukraine te an inkhel ang.
Zanin inkhela chak zawk hian June 5, Pathianni zan dar 9:30 hian Wales nen World Cup khel tur an zawng dawn. Wales hian playoff final thleng turin March thla tawp khan Austria 2-1 in an hneh.
Ram tan
Ukraine striker Roman Yarem-chuk chu February thlaa West ham leh Portuguese club Vitoria Guimaraes te inkhelh ṭumin thlak a ni a, entu mipuiin standing ovation an pe.
Yaremchuk chuan, "Ukraine-ah ka ṭhiante chuan indona an hmachhawn a, ka hnampuiten kan ram tan theihtawp an chhuah. Kei chu Ukraine-ah ka indo ve thei lo a, khelmualah ram tan theihtawp ka chhuah thung ang," tiin a sawi.
West Ham striker Yaremchuk-a rilru put hmang hi Ukraine player-te rilru put hmang tur a ni a, Scotland tan a harsa sawt ang. Manchester City-in Premier League nomawi an chawi ṭum pawhin Ukrainian midfielder Oleksandr Zinchenko chuan nomawi chu Ukraine flag-in a tuam.
Engtin zel?
Scotland hian 1998 World Cup an khelh hnuah khawvela football inelna lian berah hian an la inlan leh lo a, Qatar-a zin turin hmabak hautak an paltlang a ṭul.
Chutihrualin Scotland hian Euro 1996 hnuah Euro 2020 an khel a, Europe-a football inelna sang ber an khelh theih avangin inrintawkna an neih phah sawt a rinawm.
Scotland hian Liverpool defender Andrew Robertson, Arsenal defender Kieran Tierney, Aston Villa midfielder John McGinn bakah Southampton duo Stuart Armstrong leh Che Adams te an kawl a, beiseina sang tak an nei ang.
Group B-a awm tur
Kumin World Cup hi Qatar-ah November 21 aṭanga December 18 thleng khelh a ni dawn a, thlasik laia World Cup inelna neih hmasak ber tur a ni. Fixtures pawh April 1, Zirtawpni khan Doha-ah pawh a ni a, group tin an intluk tlang hle.
Scotland, Ukraine leh Wales te aṭanga tling tur awmna pawh a hriat tawh a, group B-ah England, Iran leh USA te nen an awm ang.
Group Inṭhen Dan
Group A: Qatar, Ecuador, Senegal, Netherlands
Group B: England, Iran, USA, Wales/Scotland/Ukraine
Group C: Argentina, Saudi Arabia, Mexico, Poland
Group D: France, UAE/Australia/Peru, Denmark, Tunisia
Group E: Spain, Costa Rica/New Zealand, Germany, Japan
Group F: Belgium, Canada, Morocco, Croatia
Group G: Brazil, Serbia, Switzerland, Cameroon
Group H: Portugal, Ghana, Uruguay, South Korea