Fiahna paltlangtu Swiatek

Iga Swiatek chuan kumin bikah atana match hautak bera ngaih a khel a, set hmasa ber a hloh hnuah Zheng Qinwen hnehin French Open quarterfinal an in vaw kai, a match lehpekah chuan Jessica Pegula nen an inkhel ang.

Thawhṭan zan Roland Garros, Paris-a inkhelah Swiatek-i'n bul a ṭan fuh vak lo, pumna leh malpui hliam tanau vangin a talbuai bawk. Mahse, world number 1 hian world number 74 Zheng lakah 6-7 (5-7), 6-0, 6-2 in hnehna a chang thei tho.

French Open 2020 champion Swiatek chuan, "Set hmasa berah khelh dan phung dik leh tihsual neih tlem ngawr ngawr ka tum a, a fuh ta chiah lo. Ka rilru in hla ka sa a, chu chuan phurna nasa tak min siamsak," tiin a thawh chhuah leh dan a sawi.

Polish nula Swiatek-i'n tun hnaiah a zawnin match 32 chhung hnehna a chang tling ta a, mimal record a neih ṭhat chu a belhchhah zel - a hma a ding nih a chakawm teh chiam lo ang tih a chiang.

Swiatek chuan sawi zawmin, "Hliam leh harsatna hi chu lo thleng thei reng a ni, hei chu infiamna in a ken tel a ni. Ka ke hliam deuh mah se ka khel zo thei a, rilru lamin cho mah se taksa in a zui theih loh chang a awm, tun ṭumah chuan ka vannei," a ti.

April 23 chinah Swiatek hian set a hloh lehna hmasa ber a ni. Chinese player Zheng-i'n a tirah ngam viau mah se set hnihnaah nasa takin a hniam, game a la miah lo. Set thumnaah Zheng rawn tho chhuak ve leh deuh mah se atan khua a tlai zo tawh.

Inkhel dangah seeded 11-na Pegula chuan Romanian nula Irina-Camelia Begu chu 4-6, 6-2, 6-3 in a hneh. A hmabak erawh a hautak tawh dawn, world number 1 Swiatek laka tlang tur chuan vanneihna a mamawh tel dawn.

Kum 28 mi Pegula hian quarterfinal a luh thlengin seeded player a la hmachawn miah lo. Swiatek nen chauh hian seeded sang an ni tawh, pakhat zawk zinkawng chu a tawp leh dawn.

Inkhel dangah Veronika Kudermetova chuan set hloh hmasa mah se Madison Keys chu 1-6, 6-3, 6-1 in a hneh a, quarterfinal-ah chuan amah ang bawka Russian player Daria Kasatkina nen an inhmachhawn chhunzawm leh ang.

World number 20 Kasatkina hian last 16 inkhel dangah Camila Giorgi chu 6-2, 6-2 in a lo hneh ve bawk. Kum 25 mi Kasatkina-i'n kumin French Open a khelh tawh chinah set a la hloh miah lo, champion tura rinkai zingah a inhlangkai der tawh.